Энэтхэгийн цагдаа нар Далай ламтай ойр дотно байдаг Кармапа ламыг Дармасала хотод байдаг хийдээсээ сая доллар завшсан, мөн Хятадын тагнуул хийж байсан хэмээн буруутган баривчилжээ.  Түүнд Энэтхэгийн цагдаагийн газар ямар нэгэн мэдэгдэл өгөлгүй шууд баривчилсан нь түвдүүдэд бухимдал бас айдас төрүүлж байгаа юм. Кармапа ламын 17-р дүр Огион Тэнли Дорж нь 26 настай бөгөөд түвдүүдийн эсрэг явуулж байгаа Хятадын бодлогыг эсэргүүцэгчдийн нэг. Тиймээс ч 2000 онд Энэтхэгт дүрвэж ирсэн байна. Кармапа ламыг Далай ламын дараа Буддын шашны бас нэг том төлөөлөгч болно гэж үздэг юм.  Түүнийг хийдээс их хэмжээний мөнгө хувьдаа авсан гэж үзэж байгаа ч өөрөө сүсэгтнүүдийнх нь өгсөн мөнгө гэж тайлбарлаж байгаа аж. Харин ямар үндэслэлээр түүнийг Хятадын тагнуулч гэж үзэж байгаагаа энэтхэгүүд тайлбарлахгүй байгаа юм.