АНУ-ын иргэн Жон Мартин Кийнийг хөнөөсөн 26 настай Ч.Баттуул өдгөө Цагдан хорих 461 дүгээр ангид хоригдож байгаа. 23 жилийн ял авсан Ч.Баттуулийн эл хэрэг одоо ч намжаагүй,  олны анхаарлын төвд байсаар байна. Тэр дундаа түүний биеийн байдал, хорих ангийн нөхцөл байдлыг мэдэхийг хүссэн хүмүүс цөөнгүй байгаа гэхэд болно. Ч.Баттуул анхан шатны шүүхийн шийдвэрийг эсэргүүцэж, давж заалдахаар болсон ч шүүх хурлын тов хараахан гараагүй байгаа юм. Тэгвэл Ч.Баттуулын аав  Н.Чулуунбаатартай холбогдож зарим зүйлийн талаар асууж тодрууллаа.

-Та охинтойгоо хамгийн сүүлд хэзээ уулзсан бэ. Баттуулын биеийн байдал хэр байгаа бол?

-Биеийн байдал нь муу байгаа. Хорих 461-ийн эмнэлэг бол сумын эмнэлгээс муу гэхэд болно. Тиймээс би ШШГЕГ-т хүсэлт гаргаж Дүүргийн эмнэлэгт хэсэг хугацаанд охиноо эмчлүүлье гэсэн. Гэвч хүлээж авахгүй удаж байна. Охины  маань ходоод үрэвсэлтэй, бөөр өвчлөлтэй гээд ер нь тааруу байгаа.

-Одоо яая гэж бодож байна?

-ХЭҮК-т хандсан. Тэд бидэнд туслана гэсэн. Эмнэлэгт эмчлүүлэхийн тулд хамгийн гол нь батлан даалтад гарах ёстой ч хууль хяналтынхан гаргахгүй байгаа.

-Давж заалдсан гэж сонссон. Шүүх хурал хэдийгээр болох вэ?

-Нэгдүгээр сард хуралдахаар болсон ч өмгөөлөгчөөс болж хойшилсон.  Ирэх сараас шүүхийн тов гарах байх.

- Охиныг чинь дарамтлаад байгаа гэх төлөөлөгч Т.Алтантамир  гэдэг хүнд гомдол гаргасан байдаг. Энэ юу болсон бэ?

-Т.Алтантамирын талаар ШШГЕГ-ын даргад гомдол гаргасан. Харин дарга нь тэр төлөөлөгчийн хоёр сарын цалинг 20 хувиар торгоод л өнгөрсөн.  Т.Алтантамирыг би  төрийн ажлыг мөнгөний бизнес болгон ашиглаж байна л гэж бодож байна. Тодруулбал, таван тэрбумын хэргээр  ял аваад байгаа М.Хулан, охины маань хэрэгт холбогдон шалгагдаж байгаа М.Жаргал гэгчийн төрсөн эгч нь юм. Тиймээс захиалгаар миний охиныг зохион байгуулалтайгаар дарамталж байна гэж үзэж байгаа.  Үүнээс болж миний охин хоёр удаа өлсгөлөн зарлаж, хэд хэдэн удаа сахилгад суусан.

Ийн 23 жилийн авсан Ч.Баттуулын ааваас цөөн хэдэн асуултанд хариулт авсан юм. Юутай ч Ч.Баттуулын биеийн байдал өдгөө маш хүнд, ар гэрийнхэн нь ихэд санаа зовнисон байдалтай байна.

Батлан даалтад гаргахгүй байгаа учир эмнэлгийн асуудлыг ярихад хүндрэлтэй зүйл их байгаа гэдгийг түүний аав хэсэг хором ярилцлахдаа дахин, дахин онцолж байв. Бид дараагийн удаад Ч.Баттуулын талаар илүү дэлгэрэнгүй баримтыг сөхөх болно.