Санхүүгийн салбарын тогтвортой байдалд төр, мэргэжлийн холбоодын хамтын ажиллагааны тууштай бодлого чухал нөлөө үзүүлдэг. Тиймээс ХАА-н биржийн брокерийн үйл ажиллагааг сайжруулах биржид шинэ бүтээгдэхүүн үйлчилгээ нэвтрүүлэх зорилгоор, төр хувийн хэвшлийн хоорондох харилцан ойлголцлын санамж бичиг байгууллаа. Санамж бичигт Санхүүгийн зохицуулах хороо, ХАА-н гаралтай бараа түүхий эд бэлтгэн нийлүүлэгчдийн холбоо, ХАА-н биржийн зохицуулах зөвлөлийн ажлын албаны удирдлагууд гарын үсэг зурсан юм.

Ингэснээр санхүүгийн шинэ бүтээгдэхүүн, үйлчилгээг нэвтрүүлэх, санхүүгийн зах зээлийг тэлэх болон хөдөө аж ахуйн чиглэлээр төрөөс баримталж буй бодлоготой уялдуулан салбарын хөгжил, дэвшил, тогтвортой байдлыг дэмжсэн бизнесийн таатай орчинг бүрдүүлэхэд чиглэсэн үйл ажиллагаанд дэмжлэг үзүүлэхийн зэрэгцээ нийгэмд хөдөө аж ахуйн биржийн арилжааны орчны үзүүлэх үр өгөөжийг нэмэгдүүлэх ач холбогдолтой юм.

Мөн Хорооны зүгээс санхүүгийн зах зээлийн оролцогчидтой хамтран ажиллах механизмыг шинэчлэн сайжруулах, төр, хувийн хэвшлийн түншлэлийн үр өгөөжтэй бөгөөд шийдвэр гаргах үйл явцад бодитой оролцох оролцоог нь хангасан хэлбэрийг бий болгон хөгжүүлэх, Хорооны зарим эрх, үүргийг холбоо руу тодорхой үе шаттайгаар шилжүүлэх эрх зүйн зохицуулалтыг бий болгох,харилцан мэдээлэл солилцож, нэгдмэл сонирхолтой хамтын ажиллагаа, уялдаа холбоог хөгжүүлнэ.

Тухайлбал, энэхүү санамж бичгийн хүрээнд биржийн арилжааны мэргэжлийн оролцогчдод эрх олгох сургалтыг зохион байгуулах асуудлыг холбоонд шилжүүлэх, эрх зүйн орчинг боловсронгуй болгох ажлын хүрээнд СЗХ-оос боловсруулж буй журам, заавруудад санал авч, зарим бодлогын баримт бичгийг хамтран гүйцэтгэхээр төлөвлөн ажиллаж байна.