Монгол Улсын Засгийн газрын 2012-2016 онд хэрэгжүүлэх үйл ажиллагааны хөтөлбөрт эрдэс баялгийн экспортыг нэгдсэн “Нэг цонх”-ны бодлогоор хэрэгжүүлэхээp тусгагдсан билээ.

Түүнчлэн төрөөс эрдэс баялгийн салбарт баримтлах бодлогын баримт бичигт Эрдэс баялгийн бүтээгдэхүүний гадаад дотоодын зах зээл дээрх борлуулалтыг нээлттэй, оновчтой, өндөр үр ашигтай, зах зээлийн зарчимд нийцсэн аргаар хийх, шударгаар үнэ тогтоох, дотоодын хөрөнгийн зах зээлийг хөгжүүлэх, экспортыг нэгдсэн бодлогоор зохицуулах зорилгоор эрдэс баялгийн бирж байгуулахаар заасан.

Энэхүү ажлын хүрээнд Олон Улсын болон дотоодын биржээс Монгол Улсын эрдэс баялгийн салбарт хөрөнгө оруулалт татах, кластер бий болгох, үнэт цаас, түүхий эд боловсруулсан бүтээгдэхүүний арилжаа, борлуулалтыг олон улсын жишигт хүргэх, эрдэс баялгийн бирж дагасан валютын урсгалыг нэмэгдүүлэх зэрэг зорилгоор Уул уурхайн яам Монголын Үнэт цаас эрхлэгчдийн холбоотой хамтран ажиллах санамж бичиг байгууллаа. Тус санамж бичигт Уул уурхайн яамны Төрийн нарийн бичгийн дарга Р.Жигжид, Монголын үнэт цаасны арилжаа эрхлэгчдийн холбооны удирдах зөвлөлийн дарга Ж.Цэдэнгарчаа нар гарын үсэг зурлаа.

Монгол улсын экспортын орлогын дийлэнх хувийг бүрдүүлдэг уул уурхайн салбарт дагнасан “Эрдэс баялгийн бирж ” байгуулахын ач холбогдол нь олон улсын зах зээлээс ихээхэн хамааралтай уул уурхайн бүтээгдэхүүний үнэ ханшийн эрсдэлийн удирдлагыг сайжруулах, уул уурхайн бүтээгдэхүүний ирээдүйн үнэ ханшийг урьдчилан таамаглаж, улмаар бүтээгдэхүүнийг зах зээлийн үнээр борлуулах юм. Түүнчлэн уул уурхайн салбарын хөрөнгө оруулалтыг нэмэгдүүлэх, гадаадын биржид бүртгэлтэй Монгол улсад үйл ажиллагаа явуулж байгаа уул уурхайн компаниудын хувьцааг Монгол улсын биржид бүртгэж арилжааг явуулах болно гэж Уул уурхайн яамнаас мэдээллээ.