Шинэчлэлийн Засгийн газрынхан 2014 оны 5 дугаар сарын 9 өдөр “Эзэн-100” хэмээх хөтөлбөрийг УИХ-аар батлуулсан. 100 хоногийн хугацаанд эдийн засгаа эрчимжүүлэн сэргээнэ гэж ард түмэндээ амласан. Өнөөх 100 хоног нь дуусахад 10 гаруйхан хоног үлдлээ.

Өнгөрсөн хоногуудад эдийн засаг эрчимжих нь битгий хэл хямарч, сүйрч байгааг ард түмэн өдөр бүр харж байна. Хэд хоног наадам, тэгш ой гэж самгардаад 100 хоногийг мартах шиг боллоо. Бусад үед 100 хоногийг ярьсаар байв.

100 хоногийг амжилттай болгохын тулд “Эдийн засгийг эрчимжүүлэх зөвлөл” ч бил үү? нэг хэсэг нөхөд ажиллаж эхэлсэн. Нөгөөдүүл нь сүүлийн үед ажиллахаа болив. Олигтой санал санаачлага гаргаж байгаа хүн ч алга. Үндсэндээ 100 хоног үлгэр байсан гэдэг нь өдөр ирэх бүр тодорхой болж байна.

Харин саяхан Засгийн газрын зарим сайдууд 100 хоногийн асуудлаас болж хоорондоо маргалдаад өнгөрсөн сураг гарлаа. Засгийн газрын гишүүд “100 хоног гэсэн санааг хэн гаргасан бэ? Ямар зорилгоор сэдсэн бэ? Энэ санааг гаргасан хүн Засгийн газарт туслах гэж биш хорлох гэж л гаргасан. Анх хэн ярьж гарч ирснийг нь олох ёстой. 100 хоног дууслаа. Тэр санааг гаргасан хүмүүс л тайлангаа тавь. Ард түмэн угаасаа 100 хоногт эдийн засгийг сайжруул гэж биднийг шахаагүй. Олон нийт сэдээгүй. Манайхан дотроосоо л сэдсэн биз дээ” гэх мэтээр хэлэлцсэн тухай яриа таржээ. Өөрөөр хэлбэл Засгийн газрынхан 100 хоногоо амжилттай болгоё гэхээсээ илүү 100 хоногийг санаачлагч буруутанг нь олох шинэ эрэлд гарсан бололтой.

“Эрэл эзнээ олно” гэдэг шиг 100 хоногийн санаачлагч тодорч эхэлжээ. Эхлээд хүн бүр л “би 100 хоногийг сэдсэн” гэж байсан бол одоо 100 хоногийг санаачилсан хүн нь олдохоо байжээ. Эцэстээ Ерөнхий сайдын Эдийн засгийн бодлогын зөвлөх Д.Батмөнх буруутнаар тодорч байгаа сурагтай. Д.Батмөнх хэмээх Ерөнхий сайдын зөвлөх хэсэг эдийн засагч нартай сууж байгаад л “Эзэн-100” хэмээх алтан санааг олж засагтаа шахсан болж таараад байгаа гэнэ. Хэрэв Д.Батмөнх гэгч санаачилсан нь батлагдах юм бол Засгийн өмнөөс хариуцлага хүлээж магадгүй байна. Тэрээр “Би энэ 100 хоногийг санаачилсан. Одоо хариуцлагаа хүлээгээд ажлаа өгье” гэж хэлээд Засгаа хамгаалах гэж үзэж болох юм. Гэхдээ нэг зөвлөхийг чөлөөлснөөр ард түмний бухимдал намдахгүй. Түмэн олны өмнө амлачихаад чадахаа болихоороо нэг зөвлөхөө ажлаас чөлөөлснөөр асуудлаас мултардаг бол сайхан л үйл явдал. Ядаж байхад 100 хоногийг Засгийн газар биш УИХ баталсан нь бүр ч асуудал үүсгэж байгаа гэнэ. Учир нь УИХ бас Засгийн газраас хэл амтайгаар батлуулж авсан 100 хоногийн тайлангаа тавь гэж шаардахаар байгаа аж. Тэр үед “Бид биш манай нэг зөвлөх санаачилсан” гэж хэлэлтэй биш тун хүнд байдалд ороод байгаа гэж эх сурвалж тайлбарлав.

Мөн 100 хоног гэдэгт ажлын болон амралтын өдөр гэдгийг ялгаж салгаж заагаагүй. Тиймээс 100 хоногийг зөвхөн ажлын өдрүүдийг оруулж тооцож болно гэсэн этгээд санаа ч гарчээ. Хэрэв ажлын өдрүүдийг тооцвол нэлээд сунжирна. Хагас, бүтэн сайн, улсын наадмын амралтын өдрүүд, ганц нэг баярын өдөр гэх мэтээр тоолвол явж өгнө. Ингэж тоолоод тэр хугацаандаа эдийн засгаа сайжруулж чадахгүй бол бүр л асуудалд орно гэж болгоомжилсон хэсэг ч гарчээ. Ямар ч байсан Засгийн газар дотроо 100 хоногоосоо болж хэрүүл маргаантай байна. 100 хоног Шинэчлэлийн Засгийн газрыг дэнжигнүүлэх гарцаагүй том хөшүүрэг учраас бүхий л талд сандарч эхэллээ.