Одоогоос яг таван сарын өмнө буюу 2014 оны 5 сарын 16-нд эр нөхрөө, эцгээ алдсан нэгэн гэр бүлээс Эрүүл мэндийн сайд Н.Удвалд хандан ил захидал илгээж байсныг үзэгчид санаж байгаа байх. Харамсалтай нь өнөөдрийг хүртэл хэрэг явдал нааштайгаар шийдэгдээгүйгээр барахгүй, Эрүүл мэндийн сайд Н.Удвал ч авч хэлэлцсэнгүй, шүүх ч тэр асуудалд ямар нэг байдлаар нааштай хариу өгөлгүй өнөөдрийг хүрлээ. Болсон явдлыг товчхон өгүүлье.

Орхон аймгийн Баян-Өндөр сумын иргэн П.Бадамжунай нь 40 ажилтантай, БСЭХ компанийг удирдан гэр бүл, ахан дүүс, хамт олныхоо өмөг түшиг болж ажиллаж амьдарч байв. Тэрээр  элдэв архаг хууч өвчингүй, архи тамхи мэтийн хорт зуршил хэрэглэдэггүй нэгэн байсан. Хэрэг явдал гарахаас хэдхэн хоногийн өмнө Эрдэнэт хотын 5-р бичил хороололд байрлах “Эрхэст Оргил” эмнэлэгийн хамар хоолойн эмч Б.Энхбатад очиж үзүүлтэл ““Эрдэнэт үйлдвэр” ХХК-ийн сувилал дээр очиж зургаа авахуулаад ир, салст нь гэмтсэн байна, зураг харж байгаад эмчилнэ” гэсэн бичиг хийж өгсөн байна. Ингээд 2014 оны 01 сарын 7-ны өглөө 9.00 цаг өнгөрөөгөөд сувилал дээр очиж хамрын зургаа авахуулахаар гэрээсээ гараад эргэж ирсэнгүй. Тухайн өдрийн 12.00 цагийн үед Б.Энхбат эмч П.Бадамжунайн эхнэр рүү ярьж, нөхөр чинь ухаан алдаж уналаа, 103 дуудсан хурдан ир гэж хэлснээр Бүсийн оншилгоо эмчилгээний төвийн хүлээн авах дээр очиход талийгаачийн хүзүүгээр хүчтэй өвдөөд амьсгаа авч чадахгүй байдалтай байж. Ингээд тархи, уушигны зураг авахуулж, цусны шинжилгээ, зүрхний шинжилгээ хийлгэж, дотор, мэдрэл, сэхээний эмч нар дараалан ирээд жижүүрийн сувилагчид хэлээд л морфин, седуксин мэтийн хүчтэй өвчин намдаагч тариануудыг зай завсаргүй хийсэн байна. 16 цагийн орчим бүх шинжилгээний хариу эерэг сайн гарсан, тархинд харвалт байхгүй, зүрх  хэвийн, амьсгалын замын дутагдлаас болж уушгинд хаван огцом үүссэн байна. Сорил тавьж үзэхэд хамар угаахад мэдээ алдуулсан эмнээс харшил үүссэн гэв. Эмчилгээ эхэллээ, та нар тайван бай маргааш гэхэд хордлого тайлагдана гэж сэхээний эмч нар ар гэрийнхэнд нь  мэдэгдэв. Үүнээс хойш 18.00 цаг өнгөрч байхад ар гэрээс нь 2 хүн өрөөнд орохыг зөвшөөрч гэргий нь хүүтэйгээ ороход талийгаач хөл гар нь хөрөөд, бие нь асар муудсан байдалтай байсан ба 15.00 орчим минут болоод хорвоогийн мөнх бусыг үзжээ.

Чих хамар хоолойн эмч Б.Энхбат өвчтөн үзээд карт нээгээгүй, сорил тавиагүй, ямар эмчилгээ хийсэн тухайг нь Бүсийн Оншилгоо Эмчигээний төвийн эмч нар мэдээгүйн улмаас мэдээ алдуулагчийн харшилд өртсөн хүнд нэмж хүчтэй хортойд тооцогддог тарианууд хийж улам харшуулжээ. Хүлээн авах нь өвчтөнөө хүлээн аваад карт нээж эмч нар нь хийсэн эмчилгээгээ шууд бичээгүй сүүлд нь нөхөж бичиж байсан болохоор хэн нь ямар эмчилгээ хийсэн нь тодорхойгүй, дахин давтан тунг нь хэтэртэл тарьсан байдаг.

Шүүх эмнэлгийн задлангийн шинжилгээний дүгнэлтэд Энхбат эмчийн буруутай үйлдэл нь тодорхой тусгагдсан байдаг.

Тухайлбал: 

1.Талийгаач П.Бадамжунайн бие цогцост хийгдсэн шүүх эмнэлгийн задлан шинжилгээгээр дотор эрхтнүүдэд үхэлд хүргэх гэмтэл тогтоогдоогүй байна.
2. Эд эсийн шинжилгээнд гарсан бичил өөрчлөлтөөс үзэхэд эмийн бодисын хүчтэй харшил урвалаас шалтгаалан амьсгал зүрх судасны хурц дутагдалд орж нас барсан байна.
3. Цус нь ABO –н системээр 0 (1)-р бүлэгтэй байна.
4.Талийгаачийн биед үхэлд шууд хүргэх архаг өвчин тогтоогдохгүй байна.
5. Талийгаачийн цусанд этилийн спирт илрээгүй болно.
6.Эмч Б.Энхбат урьдчилан үзлэг шинжилгээ хийгээгүй, зохих эмнэлгийн үзлэг эмчилгээ шинжилгээний карт хөтлөлгүй эмчилгээ явуулсан алдаа дутагдал тогтоогдож байна. Нөгөөтэйгүүр эмнэлэгт үйлчлүүлж байгаа өвчтөнийг үзлэг хийгээд шаардлагатай шинжилгээ хийх журамтай. Тухайн үед эмчилгээ хийхээс өмнө үзлэг шинжилгээ бүрэн хийсэн бол дээрх хүндэрлээс сэргийлэх боломж байсныг үгүйсгэхгүй гэх дүгнэлтүүд гарчээ.

Тэр цагаас хойш тухайн хэрэгт холбогдох шүүх хурал 5 удаа хойшилсон бөгөөд энэ хооронд Б.Энхбат эмч нь Шүүх эмнэлгийн шинжилгээний дүгнэлтээс тэс хөндлөн дүгнэлтийг эмч нараар гаруулсан байдаг. Эмч нарын гаргасан дүгнэлт нь товчхондоо Б.Энхбат эмч буруугүй гэж гарсан байдаг. Гэтэл Шүүх эмнэлгийн дүгнэлт дээр дурдсанчлан эмчийн буруутай үйл ажиллагаанаас шууд хамааралтай болохыг хэлж өгдөг. Ингээд  11 дүгээр сарын 5-нд болсон 6 дахь удаагийн шүүх хуралдаанаас Б.Энхбат эмчийн өөрийн танил тал, багш нараар өөрийн алдаа дутагдлаа өмгөөлж хамгаалсан элдэв эмч нарын дүгнэлт, Шүүх эмнэлгийн шинжилгээний зөрүүтэй дүгнэлтээс үүдэн 14 хоногийн дотор энэхүү дүгнэлтүүдийн аль нь зөв эсэхийг тогтооно гээд өндөрлөв.

Б.Энхбатын хувьд Эрдэнэт үйлдвэрийн эмнэлэг, сувиллын албанд гэрээгээр ажилладаг эмч байсан бөгөөд талийгаачийн ар гэрийнхэн Эрдэнэт үйлдвэрийн эмнэлэг сувиллын албанд удаа дараа хандаж үзжээ. Тус үйлдвэрийн эмнэлэг сувиллын албаны дарга н.Ганчимэг гэх эмэгтэй талийгаачийн ар гэрийнхэнд “Энэ хэрэг ядлын талаар би мэдэхгүй, Б.Энхбат эмч манайд гэрээгээр ажилладаг байсан. Эрдэнэт үйлдвэрийн захиргаа л мэдэх байх” гээд өөрөөсөө асуудлыг түлхээд бараг л зугатжээ. Өнөөдрийг хүртэл Эрдэнэт үйлдвэр ч тэр, тус үйлдвэрийн эмнэлэг, сувиллын алба, түүний дарга н.Ганчимэг ч тэр хариуцлагаас бултаж, хүний амь насыг юман чинээ бодохгүй явна. Үхсэн хүнийг босгоод ирэхгүй ч гэсэн бүтэн жилийн турш талийгаачийн араас уй гашууд автан, гэм буруутныг тогтоож, үнэн мөнөөр нь шүүлгэнэ гэж итгэсэн ар гэрийнхэнд нь тус байгууллага нэг ч төгрөгийн нөхөн олговор битгий хэл нэг удаагийн сэтгэлийн дэм үзүүлэлгүй хүний мөсгүй зан гаргасан байна.

Н.Удвал сайдад бичиж байсан ил захидлыг энд дарж уншина уу.