Дүүрэг дүүргийн татварын байцаагч нарын их хэмжээний мөнгөөр өөрсдийгөө урамшуулсан хэрэг багагүй шуугиан дэгдээж байна. Цөөнгүй хэдэн хүн холбогдсон уг хэргийг одоогоор Авлигатай тэмцэх газар шалгаж байгаа юм. Одоогийн байдлаар татварын хэлтсийнхэн бараг 2009 оноос урамшуулал маягаар 42 саяаас 2.6 тэрбум төгрөгийг өөрсдөдөө олгосоор байсан нь тогтоогдоод байна. Тэд үүнийгээ хуулийн дагуу, бас авах ёстой зүйлээ авсан мэтээр мөрдөн байцаалтын явцад мэдүүлж байгаа талаар эх сурвалж мэдээллээ.

Хамгийн гол нь тэд татвар төлөгчдийн мөнгөөр өөрсдийгөө ийн урамшуулж байсан нь олон нийтийн бухимдлыг төрүүлээд байгаа юм. Үүнээс болж зарим иргэд ажлаа хаяад татварын байцаагчаар ажилладаг ч юм уу гэж хошигнож байгаа нь нууц биш билээ.

Улс орны эдийн засаг хямралтай, төсөв мөнгө бүрдэхгүй, улсаас өгч байгаа төсвийг танасан байдалтай байгаа энэ үед жижиг дунд аж ахуй эрхлэгчид хийгээд зарим компаниуд шил шилээ даран дампуурч байгааг Монголын ард түмэн мэдэж байгаа. Эдгээр компаниудын ихэнх нь татвараа төлж чадахгүй, дансаа хаалгаснаас үүдэж хаалгаа барьж байгаа гэхэд болно.  Гэтэл нэг хэсэг нөхөд ийм хүнд байдалтай байхад, татвар төлөхийг шаардаж, шахаж, дарамталж суудаг татварын байцаагчид тэднээс авсан мөнгөнөөсөө урамшуулал хүртэж байгаа нь шударга бус юм. Тиймээс ч зарим томоохон компаниуд татвар төлөхгүй байх уриалга гаргахаар зэхэж байгаа сурагтай. Мэдээж тэд компаниудыг дарамталж татвар авч, түүнийгээ өөрсдөдөө урамшуулсан татварынхныг шүүмжилж, тэр мөнгөө улсад тушаахаас нааш татвар өгөхгүй гэх уриалга гаргах юм байна.

Татвар төлөгчдийн төлсөн мөнгийг улсад төлөхгүй тэрбум, тэрбумаар нь өөрсдөдөө авч байсан татварын байцаагчид сардаа ч, жилдээ ч тэр Ерөнхийлөгч, УИХ-ын гишүүдээс  өндөр цалин авдаг байсан байгаа юм. Учир нь Ерөнхийлөгч, гишүүд сардаа 2 сая ч хүрэхгүй цалинтай байдаг. Мэдээж үүнээс нь унаа, утас, хоолны мөнгө суутгагдана гэхээр тэдний сарын цалин нэлээд багасаад явчихна. Гэтэл төрийн түшээдүүсээс татварын байцаагчид хэд дахин илүү цалин авч байгаа нь хүмүүсийн сонирхолыг төрүүлээд байгаа юм.

Түүнчлэн, Монголдоо хамгийн өндөр цалинтайд тооцогддог Дээд шүүхийн шүүгчдээс ч  илүү мөнгө татварын байцаагчид олж байгаа юм. Урамшуулал маягаар тэдний авч байгаа мөнгө нь Дээд шүүхийн шүүгчид аваад байгаа 3-3.2 сая төгрөгнөөс хэд дахин илүүгээр даваад гарчихсан гэвэл та итгэх үү?

Бүр тодруулбал, Дээд шүүхийн шүүгч сард 3 сая, жилд 36 сая төгрөгний цалин авч байхад ганцхан татварын дарга жилд хамгийн багаар бодоход  42 саяыг урамшуулал болгож өөртөө авч байх жишээний.

Юутай ч Монголдоо хамгийн өндөр урамшууллыг өөрсдөдөө бэлэглэсэн татварынхны асуудлыг хуулийн байгууллагынхан хэрхэн шийдэхийг иргэд анхааралтай ажиглаж байна.

Ингээд олон сая төгрөгний урамшуулал авч АТГ-аар шалгагдаж байгаа байцаагчдын нэрсийг, урамшуулал болгож авсан мөнгөн дүнтэй дор хүснэгтээр танилцуулж байна.