Сүү, цагаан идээ худалдан борлуулах үйл ажиллагаа явуулдаг Булган сумын хүнсний захуудад аймгийн Засаг даргын зөвшөөрөлгүй архи, согтууруулах ундаа худалдан борлуулж байгаа зөрчлийг илрүүлэх, үйл ажиллагаа явуулж байгаа иргэдэд “Архигүй Булган” хөтөлбөрийг сурталчилах, Архидан согтуурахтай тэмцэх тухай хуулийн холбогдох зүйлийг тайлбарлан зөвөлгөө өгөх зорилгоор “Шимийн архи” хэсэгчилсэн арга хэмжээг зохион явуулжээ.
Арга хэмжээний хугацаанд Архидан согтуурахтай тэмцэх тухай хуулийн 6.1-д заасан “аймаг, нийслэлийн засаг даргын зөвшөөрөлгүйгээр,эсхүл зөвшөөрөлд зааснаас бусад газарт болон гар дээрээс согтууруулах ундаа худалдах, түүгээр үйлчлэхийг хориглоно” гэсэн заалтыг зөрчин гар дээрээс Шимийн архи зарж байсан хоёр зөрчил илрүүлсэн байна. Улмаар худалдан борлуулж байсан 27 литр шимийн архийг хураан авч, зөрчил гаргасан хоёр иргэнийг Монгол Улсын Архидан согтуурахтай тэмцэх тухай хуулийн 16- зүйлийн 16.1.7-д зааснаар тус бүрийг 35000 төгрөгөөр торгож арга хэмжээ авч, захиргааны журмаар хураан авсан 27 литр шимийн архийг аймгийн “Захиргааны журмаар хураагдсан эд зүйлийг шийдвэрлэх зөвлөл”-д шилжүүлэн өгчээ.
Монгол Улсын Архидан согтуурахтай тэмцэх тухай хуулийн 3-р зүйлд “Хүнсний зориулалтын түүхий эдээр үйлдвэрлэсэн спирт, бүх төрлийн архи, 2 хувиас дээш этилийн спирт агуулсан дарс, пиво, сүүн бүтээгдэхүүнээр нэрсэн шимийн архи согтууруулах ундаанд хамаарна” гэж заасан байдаг аж.