УИХ-ын олон гишүүний утсанд төмөр замын царигийг батлах үеэр нэгэн дуулиант мессеж ирсэн.  Уг мессеж "Хужаа цариг, газрын хууль, Bank of China", "2016 он гэж бий шүү" гэх мэт олон янзын хувилбартай байсан билээ. УИХ-ын гишүүдийн утаснаас иймэрхүү утгатай мессеж сонгогчидод нь очсон. Бас өөрсдийнх нь утаснаас өөрсдөд нь ч мессеж ирж гайхшруулсан.

    Тиймээс энэ үйлдэлийг төрийн эрхийг хууль бусаар авах, олон түмнийг турхирсан гэх мэт олон шалтгаанаар шалгуулах ёстой гэж гишүүд үзсэн. Ингээд уг асуудлыг шалгаж тодруулах үүргийг УИХ-ын дарга, Аюулгүй байдал гадаад бодлогын байнгын хорооноос ТЕГ-т өгсөн. ТЕГ асуудлыг шуурхайлан шалгаад дүнгээ УИХ-ын Тусгай хяналтын дэд хороонд танилцуулжээ.

    Эх сурвалжийн мэдээлж байгаагаар бол нууц мессежний асуудалд УИХ-ын нэгэн гишүүн холбогдсон гэж ТЕГ үзсэн бололтой. Тиймээс уг гишүүнийг шалгах гэхээр халдашгүй бүрэн эрхтэй учраас болохгүй байгаа аж. Ингээд шалгалтыг зохих журмын дагуу явуулах боломж олгохыг ТЕГ-аас УИХ-д хандахаар бэлтгэж эхэлсэн гэнэ. Хэрэв энэ үнэн бол УИХ-ын нэгэн гишүүний бүрэн эрхийг түдгэлзүүлэн байж шалгах нөхцөл байдал үүслээ. Зарим эх сурвалжууд ийм асуудалд эрх баригч хүний гишүүн оролцсон бол дарагдуулан өнгөрөх магадлал өндөр хэмээн үзэж байна. Гэтэл АН-ын дотоод зөрчил хурцадсан учир уг гишүүнийг шуурхай шалгуулж мэднэ гэж үзэх байр суурьтай иргэд ч байна.

    Хэрэв ТЕГ-аас бичиг ирсэн нь тодорхой болж УИХ-ын нэгэн гишүүнийг эргүүлэн татна гэвэл нийгэмд ихээхэн дуулиан шуугиан түгэх нь ойлгомжтой. АН-ын нэр хүнд өдөр ирэх бүр эрчимтэй унаж байгаа. Засгаа огцоруулсан. Эдийн засгаа унагасан. Ийм байхад нэг гишүүн нь төрийн эрхийг хууль бусаар булааж авах асуудалд орооцолдвол ч АН-ын нэр хүнд гэрлийн хурдаар ураадах нь тодорхой юм. Тиймээс асуудлыг олон талаас нь судалж ард түмэнд танилцуулах ёстой гэсэн яриа өчигдөрөөс саарал ордноор тарж эхэллээ.