Хэлсэн үг нь үйлдэл болж, хийсэн ажил нь хөрсөнд бууж үр дүнг нь хардаг байх тийм шударга зарчимыг нийгэм аяндаа шаардах болсон. Энэ зарчимыг бий болгохын тулд залуучууд өөрсдөө бэлтгэгдэх ёстой, боловсрох ёстой гэдгийг “Улс төрд шинэ манлайлагч” зорилтот телевизийн төслийн шилдэг оролцогч нар харуулж байна. Тэд шийдлээ хүлээсэн асуудлыг зориглон хөндөж, өөрсдийн байр сууринаас гарах гарцыг хамтдаа эрэлхийлж, нийгэмд, олон нийтэд нөлөөлөл бий болгох олон шинэ ажлыг санаачлан хэрэгжүүлж байгаа.Төслийн “Ас Ас” багийн залуус энэ удаад нөлөөллийн ажлыг санаачлан, “Ухаалаг шийдэл – Эко аялал”-ыг зохион байгуулж, нийт оролцогчид болон дэмжигч байгууллагууд хамтран оролцлоо. Байгаль эх дэлхийгээ хайрлах, эко үйл ажиллагааг идэвхжүүлэхэд олон нийтийн дуу хоолой, хамтын хүч, оролцооны асуудал чухал байгаа тул залуус энэ асуудалд өөрсдийн үзэл бодлоо нэгтгэсэн нь энэ. Үйл ажиллагааг дэмжин “Женко тур бюро” ХК, Монголын хийн түлшний салбарын анхдагч “Дашваанжил газ”, “VIP”такси үйлчилгээний компанти хамтран ажиллалаа. Эко аялагч залуус нэг өдрийг эрүүл агаарт оюуны тоглоом тоглон хөгжилтэй өнгөрүүлсэн юм.
“VIP такси сервис” ХХК-ийн захирал Б.Ганчимэг: Манай байгууллагын хамт олон “Ас Ас” багийн залуучуудын санаачилсан эко аялалыг дэмжиж хамтран ажиллаж байгаа. Агаарын бохирдлыг бууруулах, байгаль орчноо хамгаалах олон зорилгыг агуулж байгаа нь манай байгууллагын уриатай нийцэж байсан. Мөн хийе бүтээе гэсэн чин хүсэлтэй залуусыг дэмжихийг чухалчилсан. Өнөөдрийн арга хэмжээ үнэхээр сонирхолтой бас хөгжилтэй болж байна.
“Ас Ас” багийн гишүүн С.Санасэр: Манай багийн залуус нийгэмд үр өгөөжтэй үйл ажиллагааг хэрэгжүүлэхийг зорьж “Ухаалаг шийдэл” төслөө эхлүүлсэн. Үүнд эрүүл мэнд, эдийн засаг, урт хугацааны бодлогын асуудлыг багтаасан байгаа. Нэг цогц болж хэрэгжих энэхүү төсөл маань улс орны нөхцөл байдал хүнд байгаа энэ үед залуучууд бодлогын хүрээнд асуудалд ханддаг, зөв өнцөг, зөв байр суурийг нийгэмд гаргадаг байх хэрэгтэй гэсэн зарчимыг харуулах юм. Тийм учраас ухаалаг эко шийдлийг олон нийтэд нөлөөлөл болгохыг зорьж өнөөдрийн аялалыг зохион байгуулж байна.
“Шинэ ялалт” багийн гишүүн Б.Мөнгөнзаяа: Залуус олон үйл ажиллагааг санаачлан хэрэгжүүлж байна. Өнөөдрийн арга хэмжээ үнэхээр сонирхолтой болж байна. Хүмүүс шатрыг өрж тоглодог бол өнөөдөр бид өөрсдөө шатар болж нүүдэл хийж тоглосон нь сонирхолтой, хөгжилтэй, басхүү их сэтгэлгээ шаардсан тэмцээн боллоо. Мөн Монгол нутаг дэвсгэрээс олдсон олон сонирхолтой түүхэн баримтыг үзэж танилцан, үндэсний хувцсаараа гоёж үзлээ. Монгол ёс заншил, уламжлалаараа бахархах сэтгэгдэл төрж байна.
“Ас Ас” багийн гишүүн Х.Ганбаатар: Манай баг эко аялалын хүрээнд явагдах багийн тэмцээнүүдийг сонирхолтой байдлаар явуулъя гэж шийдээд хүмүүсийг шатрын хөлөг дээр гаргаж тоглууллаа. Оролцогч нарт сонирхолтой сонин санагдсан байх. Яагаад заавал шатрын спортыг сонгосон бэ гэхээр манлайлагч хүн хоёр, гурван нүүдлийн цаадахыг хардаг. Өөрөөр хэлбэл алсыг харж зорилгоо тодорхойлдог байх ёстой гэсэн үүднээс сонгосон. Өдөрлөгт оролцсон залуучууддаа өөрийн ажилуулдаг оюун ухаан хөгжүүлэх тоглоомын дэлгүүрийн бүтээгдэхүүнээс бэлэг болгон дурсгасан. Олон хүн хэрэгтэй, сонирхолтой бэлэг байна гэж хэлсэн.
Манлайлагч залуус ажлын нэгэн өдрийг эх дэлхийгээ хайрладаг, эрүүл ухаалаг хэрэглээг дэмжигчидтэй хамтран ач холбогдолтой, бусдад ухаарал хайрласан, шинэ санаачилга гаргаж ухаалаг сонголт хийхэд нөлөөлсөн сонирхолтой үйл ажиллагааг зохион байгууллаа. “Ухаалаг шийдэл” төсөл үргэлжилж байна.
