Эрүүл мэндийн дэд сайд Ж.Амарсанаа салбараа тэргүүлэхэд бэлэн гэдгээ ил цагаанаар зарлав. Тэрбээр "ТV 5" телевизэд өгсөн ярилцлагадаа Эрүүл мэндийн салбарыг удирдахад хэзээд бэлэн байгаа гэдгээ дурдаад хэрвээ сайд болбол бололцоотой бүхий л зүйлийг хийнэ гэлээ. Түүний хувьд сүүлийн нэг сайд Н.Удвалтайгаа эрс муу харилцаатай болж, хэвлэлээр янз бүрийн дайралтыг хийх болсон. Тэгвэл энэ нь Эрүүл мэндийн сайд болох хүсэлтэй нь холбоотой байж мэдэхээр боллоо.
                  Элэгний С вирүсийн эм оруулж ирэхээс эхлээд хаалт, хавчлагатай тулгарсан түүний эрх мэдэл янз бүрийн зүйлд дутагддаг бололтой. Тиймээс ч илүү их эрх, мэдэл рүү очихыг хүсч буйгаа олон нийтээс санаа бодолгүй хэлсэн нь энэ биз.
Түүн шиг "Би сайд болмоор байна" гээд зоригтойхон хэлчих хүн өнөөдөр ганц байхгүй. Улс төрийн тохироог үргэлж олны нүднээс нууцаар хийдэг болсон энэ цаг үед бол бүр төсөөлөгдөхгүй зүйл юм. Сүүлийн үед Засгийн газрыг байгуулах их ажилд улс төрчид толгой хүзүүгүй шургаж, унтах ч завгүй тохироонуудыг хийж яваа. Энэ хэрээр Ерөнхий сайд Ч.Сайханбилэгийг Засгийн газраа хэрхэн бүрдүүлэхийг олон нийт маш анхааралтай ажиглаж байна. Чухам аль намын хэн нь ямар яамыг авах эсэх нь одоогоор тодорхойгүй ч шинэ засгийн газрыг АН, МАХН, МҮАН, ИЗНН, МАН гээд улс төрд суудалтай намуудын төлөөллөөс бүрдүүлэх нь тодорхой юм.
                Харин чухам аль намаас Эрүүл мэндийн сайдыг томилох юм. Ер нь аль ч намын хэн очих нь иргэдэд огт сонин биш байгаа. Чухам энэ салбарыг хөл дээр нь босгож чадах, эрүүл мэндийн хуулиудыг боловсронгуй болгож чадах, хүн амынхаа эрүүл мэндийг нэгдүгээрт тавьж чадах хүн л хэрэгтэй.  Ядаж л эрүүл мэндийн үйлчилгээг сайжруулж олон улсын стандартад чирээд аваачиж чадах л хүн юун түрүүнд хэрэгтэй.
Эрүүл мэндийн яамныхан дэд сайд Ж.Амарсанааг Н.Удвалаасаа илүү ажилладаг гэж ярьдаг. Магадгүй яагаад энэ салбарыг толгойлж болохгүй гэсэн бодол тус яамныханд байгаа л байх.
Ард түмэндээ ил цагаанаар хэлээд энэ суудалд очиж байгаа юм чинь нэрээ бодоод сайн ажиллаж ч магадгүй юм.
Гэхдээ Монголын хамгийн хоцрогдолтой, хүнд сурталтай, хөгжилгүй салбарыг хэн авч явах нь маш чухал. Тэгэхээр энэ салбарт хамгийн хариуцлагатай томилгоог хийх ёстой билээ.