МАН-ын дарга, ерөнхий сайд С.Батболд АН-ын экс сайд нарын оронд ажиллах зургаан хүнийг томилохоор өнгөрсөн долоо хоногт ерөнхийлөгч Ц.Элбэгдоржтой зөвшилцсөн. Гэсэн ч ерөнхийлөгч шинэ хүн томилох гэж хэт их яарсны хэрэггүй, эхлээд АН-ын сайд нарыг ажлаас нь албан ёсоор чөлөөлөх ёстой гэж хатуухан шүүмжилсэн. Харин нэгэнт АН-ын сайд нарыг ажлаас чөлөөлсөн тул өчигдөр үдээс хойш Засгийн газар ерөнхийлөгчид зөвшилцөх бичгээ дахин ирүүлсэн байна. Үүнд “Таны тавьсан асуудлын дагуу өмнөх Засгийн газрын гишүүн, сайд нарыг үүрэгт ажлаас нь чөлөөлснийг мэдэгдээд шинээр ирүүлсэн зөвшилцөх хүсэлтдээ өмнө санал болгосон У.Хүрэлсүх, Д.Хаянхярваа, Д.Цогтбаатар, Ж.Энхбаяр, Ц.Дашдорж, Н.Хүрэлбаатар нарыг Засгийн газрын гишүүн, сайдаар томилуулах хүсэлтээ дахин илэрхийлж байна” гэжээ. Сайд болохоор нэр дэвшээд байгаа хүмүүсийн чадварт “үл итгэгчид” иргэдийн дунд байтугай МАН-ын гишүүд дотор ч байгаа нь сүүлийн үед ажиглагдах боллоо. Даваа гарагт МАН-ын бүлгийн гишүүд өдөржин хаалттай хуралдсан нь ерөнхийлөгчид “гологдсон” хүмүүсийг дахин нэр дэвшүүлэх тухай байжээ. Ширүүхэн маргасан ч намын дарга хүчтэй гэдгээ харуулж “гологдсон” хэдийгээ аваад гарсан аж. Харин ерөнхийлөгчийн хувьд одоо тэдний томилгоог хойшлуулах шалтгаангүй болсон. Учир нь тэрбээр Өмнөговь руу Ц.Дашдорж гишүүнтэй явж барилга, байгуулалтын ажилтай нь өөрийн биеэр танилцуулсан. Энэ хугацаанд бусад нь ч бас хүлээж авах ажилтайгаа танилцаад авсан гэв. Энэ долоо хоногт шинэ сайд нарыг томилоход саад, тээггүй болжээ. Дашрамд дуулгахад МАН-ын гишүүд тэргүүн шадар сайдад У.Хүрэлсүхийг томилж, намын ажлыг хоёрт тавьж байгаад баахан дургүй байгаа гэж эх сурвалж мэдээллээ.