“Мммммм. Цөл газарт хонин гүрвэл болж төрөх нь дээ. Буруу номтны хорлол болж” гэж  ах ламтан хэлсэн л бол түүний зөв. Дээ-ээ-ээр үеийн монгол хүмүүс тэр чигээрээ Будда бурхныг шүтэж байсан гэхэд болно. Тэгвэл дээ-ээ-ээр үеийн монгол хүний бага болон их тархинд одоогийнх шиг мах, бензин, инфляци зэрэг ойлгогдохгүй хүчин зүйл нөлөөлдөггүй байсан. Гадны элдэв, шалдав хүчинд автдаггүй болоод ч тэр үү тууштай, шударга хүмүүс байсан байж мэдэх юм. Тиймээс эрт дээр үеэс амжилттай ухуулга, PR-нөлөөгөөр шарын шашнаа шүтэн биширч, сүслэн мөргөсөөр ирсэн. Аливаа нүүдэл суудал, гадны халдлагад өртлөө гэхэд монгол эр хүн гал голомт болсон тулгаа үүрч, бурхан, номоо өвөртлөөд л явдаг байлаа.
   Харин одоо үед шашин ч шүтээд байгаа юм шиг, бурхан ч шүтээд байгаа юм шиг, хүн ч шүтээд байгаа юм шиг сонин болчихож. Амихандаа л залбиран мөргөж байгаа бололтой нэгэн залуу явган суунгаа “Будда намайг Есүс шүтдэгийг мэднээ Аллах минь” гэж хэлснээ, эхлээд 2 алгаа дээш харуулан өргөснөө аяархан хоёр алгаа нийлүүлээд, адаг сүүлд нь “гурвынхаа” дунд, хоёр мөрөндөө, цээжиндээ цэг тавьж дуусгахав. Хотын нэг захаас нөгөө зах хүрэхийн хооронд шашны ухуулгад автан гурван шашин зэрэг шүтэх болсон гэнэ.
    Хамгийн сүүлийн жишээ гэхэд “Энх тайвны наадам” нэртэй шашны сурталчилгаа эзэмдэнхэн баясаад явсан. Энэ нь Мүүн. Гишүүдээ жинхэнэ хүү, жинхэнэ охин гэх мэтчилэн нэрлээд мөнгө хураана. Та жинхэнэ хүү, эсвэл жинхэнэ охин болсон тохиолдолд “сохор болзоо” мэт гэрлэх ёслол үйлдэнэ.
   Дэлхийд ноёлохын тулд шашин мөнгөтэй байх хэрэгтэй. Гадны шашин ирээд өөрийн гэсэн стратеги төлөвлөгөөний дагуу хамгийн амар эзэмдэх боломжтой хүүхдүүдийг “онхолдуулна”. Энэ нь их гоёор. Жишээ нь Христийн шашин, хүүхдийн баяр, шинэ жил, төрсөн өдрөөр нь бэлэг өгнө. Хөдөөний сумдын засаг дарга нарт хэдэн “янчаан+библи” өгөөд соёлын төв, тамгын газарт нь өрөө гаргуулан үйл ажиллагаагаа явуулна.
Баяр дөхөхөөр бяцхан хүүхдүүд нь “Есүс ирлээ, Есүс ирлээ” гээд хөөрөн баясна.
   Манай улсын хувьд одоогийн байдлаар 20 төрлийн 390 гаруй шашны байгууллага үйл ажиллагаа явуулж байдаг гэсэн тоо байдаг. Хамгийн их нь Христийн шашин. Энэ олон шашныг дагаад элдэв мухар сүсгийн зүй бус үйлдэл ихэсч, бүр цаашлаад хүүхэд үрчлэлийн асуудал хүртэл хурцаар яригдах болсон нь нууц биш. Нөгөө нэг яриад байдаг хүний наймаа шашны нөлөөгөөр илүү хууль ёсны бөгөөд боловсронгуй болоод байх шиг. Энэ олон шашны алийг нь шүтэхээ жирийн иргэд мэдэхээ байлаа. Алийг нь шүтэх вэ? Заримыг нь сонсох нь ээ “МАНАН”-ын амлалтаас илүү зүйл хэлэх юм.
   Гэхдээ одоогийн урсгал сүсэгтнүүд нийтдээ, нэг зүйлийг, өглөө бүр бодон залбирдаг. Энэ нь саарал ордны зангиатнууд битгий дахиж хууль батлаасай гэж. Урт нэртэй, сонгуулийн, уул уурхайн энэ их нүргээнд 1993 онд баталсан шашны тухай хууль “оготно” мэт санагдаж болно. Гэхдээ эргэн нэг харахгүй бол бага багаар үзэл суртлаараа идэгдэж дуусах нь ээ, та бидний хэлдэг цөөхөн монголчууд.
   Шашны тухай хууль батлах гэж байна гэвэл харин дээр өгүүлсэн өглөө бүр залбирдагаа түр азнаж мэдэх юм. Энэ чигээрээ идэгдсээр байвал:  Гуравдугаарт. Ирээдүйн монгол шалдан буюу мэдэхгүй шашинтан болно. Алийг нь шүтэх вэ?