Азийн сангийн судлаач Tirza Theunissen Монголын эдийн засгийн нөхцөл байдлыг ингэж дүгнэжээ.

    Сүүлийн дөрвөн жилд Монгол уул уурхайн тэсрэлтийн ачаар дэлхийд эдийн засгийн өсөлтөөрөө тэргүүлэгчдийн эгнээнд багтаж байлаа. Нийслэл Улаанбаатар хотод энэ өсөлт илэрхий мэдрэгдэж, тэнгэр баганадсан өндөр барилгууд, тансаг дэлгүүрүүд хэрэглэгчдийн анхаарлыг татахаар зай завсаргүй баригдаж байсан юм. Гэсэн хэдий ч, эдийн засгийн урсгал өөрөөр эргэж, урьдчилан тооцоолж байсан өсөлт нь нэг оронтой тоонд буужээ.

Монголын эдийн засгийн өсөлт саарсанд хэд хэдэн шалтгаан бий. Экспортын гол бүтээгдэхүүн болох зэс, нүүрсний ханш унаснаар орлого нь 800 сая ам.доллар болтлоо буурчээ. Өнгөрсөн онд уул уурхайн лиценз, гэрээг тойрсон маргаанаас болоод гадаадын шууд хөрөнгө оруулалт 54 хувиар буурсан нь бас нэгэн шалтгаан юм.

    Эдийн засгийн өсөлтийн ачаар 2010 онд ядуурал 38,7, 2012 онд 27,4 болтлоо буурсан ч энэ нь зөвхөн уул уурхайн баялгийг дагасан ашиг байлаа. Баялгийг тэгш бусаар хуваариласан гэж үзэх хүмүүс олон байгаа ажээ. Хөдөөгийн ядуурал 35,5 хувь байгаа бол хотод 23,2 хувьд хүрчээ. Эдийн засгийн таатай нөхцөл боломж үүслээ гэдэгт найдан хөдөөнөөс хотруу шилжин ирэгсдийн тоо өссөөр... Хүн амын 60 хувь нь Улаанбаатарт амьдарч байгаа ч ихэнх нь гэр хороололд суурьшдаг.

Шилжин ирэгсдийн дийлэнх нь албан бус салбарт бага цалинтай ажил эрхэлж байна.
Энэ бүхэн нь Улаанбаатар дахь ядуурал газар авахад нөлөөлөв. Одоо эдийн засгийн уналт нь ядуурлын түвшин өсч, орлогын тэгш бус байдал үүсэхэд нөлөөлсөн гэдэг асуудал тулгарч байна. Өндөр инфляци хоол хүнс, тээвэр, орон сууц, гэрэл цахилгааны үнэ өсөхөд хүргэжээ. Эдийн засгийг буцаан сэргээхийн тулд Монголын Засгийн газар ажлын байрыг нэмэгдүүлж, нийгмийн үндсэн үйлчилгээнд анхаарах хэрэгтэй болжээ.

Хотжилт үргэлжлэхийн хэрээр Улаанбаатарын эдийн засаг өөрөө өргөжих нь чухал байна. Мөн өөрөө хөрөнгө үйлдвэрлэгч болох хэрэгтэй юм. Үүнд богино биш урт хугацааны төлөвлөгөө чухал билээ. Азийн сан гэр хорооллыг дэмжсэн үйл ажиллагаа явуулсан хэвээр байна.