Дэлхийн нийтээр олон сая сая хүнийг өөртөө татаж буй нийгмийн сүлжээнүүдийг улс төр, бизнесийн пи-ар-ын хэрэгсэл болгон ашиглах хандлага ид өрнөж байна. Манайд ч энэ жишгийн дагуу улс төрчид нийгмийн сүлжээг пи-ар-ын хэрэгсэл болгон ашиглах үзэгдэл 2012 оны парламентын сонгуулиас хойш эрс нэмэгдлээ. Өөрсдийгөө ард түмний нэгэн адил хүн, тэднийг хүндэлдэг гэдгээ батлахыг хүссэн УИХ-ын гишүүд facebook, twitter-ээс салахаа байлаа.
Тэдний заримынх нь нийтэлсэн зураг, байр суурь интернэт орчинд олны дэмжлэгийг хүлээж байгаа бол заримынх нь зорилгынхоо эсрэгээр үйлчилж шүүмжлэлийн бай болгож байна.

www.24tsag.mn сайт нийгмийн сүлжээнд нэр хүндээ өргөх гэсэн ч  улчтөрчдийн "шоу"-г түүвэрлэн хүргэж байна. 1.    УИХ-ын гишүүн С.Ганбаатар, О.Баасанхүү нар хоёрдугаар сарын 25-27-ны өдрүүдэд Сэлэнгэ аймагт ажилласан. Тэд иргэдийн хүсэлтийг дагуу Мандал суманд очиж Ноён уулыг эргэсэн билээ. Тэгвэл хэдхэн хоногийн өмнө С.Ганбаатар гишүүн Сэлэнгэ аймагт ажилласан зургуудаа Нүүр номондоо хийж эхэллээ. Тэрээр энэ зурагт жирийн л нэг жолоочийн адил цасанд суусан машинаа хөдөлгөхөөр хүрз барин цас цэвэрлэж байна. Харин энэ зургийг хүмүүс шоу хийлээ гэж ихэд шүүмжилсэн бөгөөд тэдний дунд УИХ-ын гишүүн М.Зоригт “Ганбаа цаана чинь зам харагдаад байх юм” хэмээн жиргэсэн байна. 2. Хоёр гишүүн Сэлэнгэ аймгийн Алтанбулаг сумын хилийн цэргийн штабтай мөн танилцжээ.  Энэ үеэр хоёулаа хилийн цэргийн хувцас өмсөж тэдний ямар хүнд нөхцөлд эх орноо хамгаалж буйг биеэр мэдэрсэн тухайгаа телевизийнхэнд ярьсан юм.  3.    Тэрээр “УИХ-ын гишүүн Д.Арвин гуравдугаар төрөх эмнэлгийг цэвэрлэлээ” гэх мэдээг хэвлэлүүдээр гарахыг хүлээж суусан биз. Гарсан ч гарсан. Гэхдээ булавч бултайна, даравч далдайна гэдэг шиг хичнээн цэвэрлэгээний хувцас өмсөж, эмнэлэг цэвэрлэж буй бичлэгээ олон нийтэд цацсан ч энэ шоу ард түмэнд наалдсангүй. Баянзүрх дүүргийн гуравдугаар төрөх эмнэлэгийн шинэ барилгын нээлтэн дээр Д.Арвин гишүүн их цэвэрлэгээний ажилд ийнхүү биечлэн оролцжээ. 4.    Дөрвөн настай бяцхан охин эцэг эхийнхээ гарт амиа алдсан хэрэг монголчуудыг нэг хэсэгтээ “сэрээлээ”. Хүүхэд, гэр бүлийн асуудлыг хөндөх шалтгаан болсон энэ хэрэг бас л улс төрчдийн шоу хийх бай болов. Охиныг дурсан Чингисийн талбай дээр зул өргөх ёслолд 10 мянга орчим хүн оролцжээ. Энэ дунд Монгол Улсын Ерөнхийлөгч асан Н.Энхбаяр ирж оролцсон нь олны анхаарлыг татлаа. Мөн түүний хамт Г.Шийлэгдамба, Д.Шаравдорж нар хүрэлцэн очиж хүүхдийн төлөө залбирсан билээ.
  5.     Сүхбаатар аймгаас УИХ-д сонгогдсон М. Зоригт жилдээ нэгээс хоёр удаа тойргийнхоо бүх сум, багаар тойрч, иргэд, сонгогчидтойгоо уулздаг. 2014 оны ирцээр тойрогтоо хамгийн их ажилласан гишүүнээр тодорсон тэрбээр хоёрдугаар сард хэд хоног тойрогтоо ажиллажээ. Энэ үеэр дуучин Д.Намсрайноровыг дагуулан явж наран мандар нутгийнхаа ард иргэдтэй хамтдаа дуулж хуурджээ.
  6.    Харин М.Зоригт гишүүнийг хол хаях дуучин бол УИХ-ын гишүүн Г.Уянга юм. Валентины баяраар залуу хосуудад зориулан УГЖ Т.Ариунаагийн дуулдаг “Жаргаж үзээгүй зул” дууг дуулж олны хүртээл болгосон тэрээр зохиолын дуучдыг хоолгүй болголоо гэсэн үнэлгээ авав. Уул уурхайн гэрээний асуудлаар ихэд завгүй байгаа харагддаг гишүүн маань дурласан хүмүүст зорилж дуу бичүүлэх завтай л байдаг юм байна.
  7.    Ерөнхийлөгч Ц.Элбэгдорж хонин жил гарснаас хойш нийгэмд хамгийн их шуугиан тарьсан шийдвэр гаргалаа. Татвараас бултсан хэргээр шоронд хоригдож байсан гадаадын гурван иргэнийг өршөөсөн ерөнхийлөгч энэхүү шийдвэрээ ингэж тайлбарласан юм. Ерөнхийлөгч өөрөөсөө илүү Монголдоо хайртай учраас гэмт хэрэгтнүүдийг өршөөж, харин тэдний учруулсан хохирлыг Монгол Улс төлөх болчихоод байгаа юм.