МАХН, МҮАН-ын улс төрийн холбоог АН-ын ҮЗХ-ны гишүүн О.Магнай, БНН-ын дарга Б.Жаргалсайхан нар дэмжиж байгаагаа ил тод илэрхийлэх болсон билээ. Хувьсгалт, өөрчлөлт хийнэ гэж наанаа ярьж байгаа ч цаанаа сонгуулийн тойрог хуваах асуудал яригдаж байгаа гэх нь ч байна. Ямартаа ч тэд Н.Энхбаяр, М.Энхсайхан нарт их л элгэмсүү хандаж ирэх сонгуулиар ганзага нийлэх нь тодорхой болоод байсан. Тэгвэл О.Магнайгийн өөрчлөлт хийнэ гэсэн дэврүүн хүслийг БНН-ын дарга “Буян”-гийн Б.Жаргалсайхан унтрааж, итгэлийг нь алдаж байгаа бололтой. О.Магнай өчигдөр Б.Жаргалсайханы зохион байгуулсан арга хэмжээнд оролцсон 20 гаруй насны залуус эрэгтэй, эмэгтэйгүй архи ууж байсанд ихэд эмзэглсэн аж. Тэрбээр өөрийн фэйсбүүк хуудасдаа “Манай залуучуудын тэмцэгч чанарыг архи л сорж байна гэсэн дүгнэлтэнд хүрлээ. Эрэгтэй, эмэгтэйгүй архи ууж байна” хэмээн бичжээ. Сонгуулийн шинэ хуулинд дайллага, цайллага зохион байгуулахыг хориглосон ч энэ мэтээр зөрчигдсөөр байна. Б.Жаргалсайхан МАХН, МҮАН-ы нээлттэй хурлын үеэр “Өөрийнхөө юмыг бусдад өгч байхад та нарт ямар хамаатай юм” гэж хэвлэлд ярилцлага өгснийхөө дараа тэрбээр залуусыг архиар дайлсан аж. Б.Жаргалсайхан үнэхээр шинэчлэл, өөрчлөлт хийхийг биш Н.Энхбаярын хормойноос зүүгдэж сонгуулийн тойрог авахыг хүсч байгаа нь улам ил болов.