Батлан хамгаалахын сайд Ж.Энхбаяр мэргэн буучдын тусгай анги байгуулах тушаал гаргасан бөгөөд түүнийг үймээн, самууны үед дайчилж байхаар шийдсэн гэх мэдээлэл АН-ынханд хүрчээ. Тус намын гишүүд сайдаас өөрөөс нь тодруулж асуух гэж мэдэгдсэн ч яг цаг нь болоход Ж.Энхбаяр АН-ын бүлгийн хуралдаанд ирж чадахааргүй болсон байна. Гишүүд салбарын сайд болсноосоо хойш хэд хэдэн томилгоо хийсэн, мөн мэргэн буучдыг бэлтгэхээр шийдсэн гэх мэдээллийг тодруулахыг зорьжээ. Долдугаар сарын 1-нд таван хүн амь үрэгдсэн бөгөөд ийм явдал дахин гарвал бэлтгэгдсэн мэргэн буучдыг сөргүүлнэ гэдэг нь ноцтой асуудал гэж АН-ынхан үзсэн байна. Нэгэнт сайд өөрөө ирж тайлбарлаагүй учраас З.Энхболд, Э.Бат-Үүл, Н.Батбаяр нар хамтраад үнэн худлыг тогтоох ажилтай болжээ.