Өнгөрсөн оны долдугаар сарын 31-ны өдөр насанд хүрээгүйчүүдийн хорих 411 дүгээр ангид хүмүүжиж байсан зургаан хүүхэд хэрмэн хашаа нүхэлж, бүлэглэн оргосон хэрэг гарсан билээ.
    Өнгөрсөн оны долдугаар сарын 31-ны өдөр насанд хүрээгүйчүүдийн хорих 411 дүгээр ангид хүмүүжиж байсан зургаан хүүхэд хэрмэн хашаа нүхэлж, бүлэглэн оргосон хэрэг гарсан билээ. Тэдэнд холбогдох хэргийг Хан-Уул дүүргийн шүүхэд хэлэлцэх байсан ч Цагдан хорих 461-р ангийн хурлын танхимд хэлэлцжээ. Хуралд ерөнхий шүүгчээр Ё.Цогтзандан, шүүгчээр Э.Хулан, С.Батсуурь, улсын яллагчаар Г.Алтанцэцэг нар оролцсон байна. Шүүх бүрэлдэхүүн хэргийг хэлэлцэж, насанд хүрээгүй ялтан А.Мөнгөндаваад Эрүүгийн хуулийн 261 дүгээр зүйлийн 261.2 дахь хэсэгт зааснаар хорих ангиас бүлэглэж, хорих ангийн барилга байгууламж, хамгаалалтын тоног төхөөрөмжийг эвдэж оргосон гэх үндэслэлээр таван  жил зургаан сар, Т.Анхбаярт 11 жил хоёр сар, Г.Алтангэрэлд 17 жилийн хугацаатай хорих ял тус тус оногдуулжээ. Тэдэнд холбогдох хэргийг өнгөрөгч арванхоёрдугаар сард шүүх байсан ч шүүгчийн тушаалаар нэмэлт мөрдөн байцаалтад буцааж байсан билээ. Тэдний дөрвийг нь хоёр хоногийн дотор хотоос, хоёрыг нь долоо хоног эрэн сурвалжсаны эцэст Сэлэнгэ аймгийн нутгаас баривчилсан юм. Тэд оргох явцдаа хулгайн гэмт хэрэг үйлдсэн нь мөн тогтоогдоогдоод байсан. А.Мөнгөнтулга, Г.Бат-Очир, Т.Анхбаяр, О.Мөнхбаатар, Г.Алтангэрэл, Э.Түмэнхүү гэх зургаан хүүхдийн гурав нь гурван удаа, хоёр нь хоёр удаа ял шийтгүүлж байжээ. Тодруулбал, дөрөв нь хулгай, нэг нь дээрэм, нэг нь хүчингийн хэрэг үйлдсэн бөгөөд тав нь жирийн дэглэмтэй хорих ангид 15 жилийн хорих ялаар шийтгүүлж байсан аж. Харин хүчингийн гэмт хэрэгтээ хүүхэд чанга дэглэмтэй хорих ангид 15 жилийн хорих ялаар шийтгүүлж байжээ.