Долдугаар сарын нэгний хэргээр шүүгдэж байгаа хуралд ЦЕГ-ын даргын үүрэг гүйцэтгэгч асан, хошууч генерал Ч.Амарболд, нийслэлийн Цагдаагийн газрын дарга асан, хурандаа О.Зоригт, Хэв журмын хэлтсийн дарга асан, хурандаа Ш.Батсүх, Нийгмийн хэв журмын  хэлтсийн даргаар ажиллаж байсан цагдаагийн дэд хурандаа Г.Ганбаатар нарыг цагдан хорих шийдвэр гаргажээ. Уг нь прокурорын газраас шүүх хурлын дүгнэлтийг буцаасан боловч Сүхбаатар дүүргийн шүүх тэднийг ШШГЕГ-ын харьяа 461-р хорих ангид хугацаагүйгээр цагдан хорихоор шийдсэн байна. Цаг орчмын өмнө цагдаагийн дэд хурандаа Г.Ганбаатарыг өмгөөлөгчгүй гэсэн гэсэн шалтгаанаар тусад нь шүүнэ гэж байсан ч түүнийг ч бас хорихоор шийдвэрлэжээ. Үүнийг шүүгдэгч нарын өмгөөлөгчид болон цагдаагийн экс дарга нарын гэр бүлийнхэн хууль бус, цагдан хорих үндэслэлгүй гэж үзсэн учир Улсын дээд шүүхэд гомдол гаргаад байгаа аж. Тиймээс Сүхбаатар дүүргийн шүүгч нар гаргасан шийдвэрээ дахин хэлэлцэж байна. Энэ хуралд даргалагч шүүгчээр Ч.Хосбаяр, шүүгчээр М.Алдар, С.Оюунчимэг, улсын яллагчаар С.Хишигжаргал нар оролцож байгаа юм.