Энэ долоо хоногт болсон онцлох үйл явдлаас хүргэж байна.
Энэ сарын 9-ний өдрийн 13.00 цагийн орчимд Төрийн ордны зүүн талд нэгэн учир битүүлэг нүх үүссэн. Уг нүхийг иргэдийн зүгээс нөгөөх “хонгил” нь энэ байсан юм болов уу гэлцэж байлаа. Мөн тухайн үед ОБЕГ-аас “Иргэний хамгаалалтын зориулалтаар ашиглаж байсан хоргодох байр байж магадгүй” гэх таамаг дэвшүүлээд байлаа. Дээрх нөхцөл байдал үүссэний улмаас цагдаагийн байгууллага болон тагнуул, онцгой байдлын байгууллагын газраас хамгаалалтад авч, тогтоохоор ажиллаж эхэлсэн. Тэгвэл Цагдаагийн ерөнхий газраас өгч байгаа урьдчилсан мэдээллээр уг нүх хуучны траншей байсан гэж тогтоогоод байна. Уг нүх нь 10 м урттай, таван м өргөнтэй, дөрвөн талаараа байгалийн чулуун ханатай, шонгийн модоор эгнүүлж таазыг хийсэн, бохирын вааран хоолойтой бөгөөд газарт нэг метр орчим гүн ус тогтсон байжээ.
Манай улсад жилд 4000 хүн сүрьеэгээр халдварладаг бөгөөд дэлхийн бусад улс оронтой харьцуулахад дээгүүрт ордог. Мөн сүрьеэ өвчний тархалт буурахгүй байгаагаас гадна цөөн хүн амтай манайх шиг улсад аюулын харанга гэж нэрлэхэд болно. Ялангуяа сурагчдын дунд уг халдвар их байгааг өнгөрсөн тавдугаар сард гарсан хэрэг нотолно. Тухайлбал, нэг сургуулийн ихэнх сурагч сүрьеэ өвчнөөр халдварласан тохиолдол илэрсэн юм. Үүнтэй холбогдуулан ХӨСҮТ-ээс сүрьеэ өвчнийг эрт илрүүлэх, оношлох зорилгоор ирэх есдүгээр сараас эхлэн сурагчдыг төлөвлөгөөт үзлэг, оношлогоог явуулах гэж байна. Амьсгалын замаар дамждаг сүрьеэ өвчний тархалт буурахгүй байгаа гол шалтгаан нь иргэд удаан хугацаагаар ханиалгах, энэ үед эмчид хандалгүй дур мэдэн эмчилгээ хийж байгаагаас тархалт нэмэгдэж байна гэж ХӨСҮТ-ийн эмч нар тайлбарлаж байна. Тиймээс урт хугацаагаар ханиалгах, халуурах, тууралт үүссэн зэрэг шинж тэмдэг илэрсэн тохиолдолд яаралтай эмнэлгийн байгууллагад хандахыг зөвлөж байна.
Түүнчлэн Богдхан ууланд зөвшөөрөлгүй барьж байсан барилгын ажлуудыг зогсоолоо. Тухайлбал, Богдхан уулын дархан цаазат газрын Арцатын аманд зөвшөөрөлгүй барилгын үйл ажиллагаа явуулж байсан “Талст ширээт” ХХК, “Амундра” ХХК, “Трай Колорс” ХХК-ны үйл ажиллагааг зогсоож, лацадсан юм. Мөн барилга барих зөвшөөрөлтэй боловч үерийн усны далан шуудууг дутуу гүйцэтгэсэн шаардлага хангахгүй “Инкоммаш” ХХК, болон “Бөхбат” ХХК-д эрчим хүчний хязгаарлалт хийж, үйл ажиллагааг тус тус зогсоогоод байна.
Мөн шинэ серийн УАА дугаар задраад удаагүй байхад дугаарууд шагчдын гарт орсон асуудал олны анхаарал татаж байна. Тэгвэл уг асуудлаар АТҮТ-өөс холбогдох байгууллагад хандсан бөгөөд “улсын дугаар авна, зарна” гэсэн долоон бүлгэмийг цагдаагийн байгууллагатай хамтран ажилласны дүнд хаажээ. Цаашид тээврийн хэрэгслийн бүртгэлийн үйл ажиллагаанд иргэний хурууны хээгээр бүртгэл хийдэг болохоор ажиллаж байгаа бөгөөд дугаарын шагчдад цэг тавихад анхаарч ажиллана гэсэн юм.
Мөн энэ долоо хоногт хоёр хоногийн дотор 10 иргэн зам тээврийн ослоор амиа алдсан харамсалтай хэрэг Тээврийн Цагдаагийн албанд бүртгэгдлээ. Зам тээврийн ослын улмаас амиа алдаж байгаа иргэдийн тоо буурахгүй байна. Тухайлбал, энэ оны эхний хагас жилийн байдлаар онхолдох байдлаар 461 осол бүртгэгдэж, 185 иргэн амь насаа алдсан статистик тоо гарчээ. Хамгийн гол нь амь нас эрсэдсэн осол хэргийн ихэнх нь хөдөө орон нутгийн замд үйлдэгдэж байна. Энэ нь ихэвчлэн хурд хэтрүүлэх, согтууруулах ундааны зүйл хэрэглэсэн үедээ жолоо барих, шөнийн цагаар гэрлээ шилжүүлэхгүй байх, гүйцэд түрүүлэх гэсэн оролдлогын улмаас гарч байна.
Ийнхүү ахлах ангийн сурагчид олон улсын химийн олимпиадаас хоёр хүрэл медаль хүртэж, Төрийн ордны зүүн талд үүссэн учир битүүлэг нүхний хужрыг тунгаасан “нууц” тайлагдсан долоо хоног болж өнгөрлөө.
Б.Лхам