АНУ-ын Ерөнхийлөгч Доналд Трамп Ирантай хийж буй хэлэлцээ гацаанд орсонд бухимдаж, Ираны эсрэг өргөн хүрээний цэргийн ажиллагааг дахин эхлүүлэх асуудлыг өмнөхөөсөө илүү нухацтай авч үзэж эхэлсэн талаар CNN олон эх сурвалжаас эш татан мэдээлжээ. 

Эх сурвалжуудын мэдээлснээр, Цагаан ордны дотоодод Ираны асуудлаар хоёр өөр байр суурь үүсээд байгаа аж. Нэг хэсэг нь Тегераны эсрэг илүү хүчтэй цэргийн дарамт үзүүлж, чиглэсэн цохилтууд өгөхийг дэмжиж байгаа бол нөгөө хэсэг нь дипломат яриа хэлэлцээг үргэлжлүүлэх шаардлагатай гэж үзэж байна.

Трампын зүгээс Иран Ормузын хоолойг үргэлжлүүлэн хааж байгаа болон цөмийн хэлэлцээнд бодит ахиц гаргахгүй байгаад ихээхэн дургүйцэж буй талаар эх сурвалжууд онцолжээ. Тэрбээр Ираны хамгийн сүүлд ирүүлсэн саналыг “бүрэн хүлээн зөвшөөрөх боломжгүй” хэмээн шүүмжилсэн байна.

Мөн АНУ “Project Freedom” нэртэй Ормузын хоолой дахь далайн цэргийн ажиллагааг дахин сэргээх талаар хэлэлцэж байгаа ажээ. Энэхүү ажиллагаа нь худалдааны усан онгоцуудын аюулгүй байдлыг хангах зорилготой байсан ч өмнө нь хурцадмал байдал нэмэгдсэний улмаас түр зогсоосон юм. 

Үүний зэрэгцээ Ирантай байгуулсан гал зогсоох хэлэлцээрийг Трамп “амьсгал хураахын даваан дээр байна” хэмээн тодорхойлсон бөгөөд хэрэв яриа хэлэлцээ ахицгүй хэвээр үргэлжилбэл АНУ цэргийн дараагийн алхам хийх магадлал өндөр байгааг ажиглагчид онцолж байна.

Л.Баяр