Сар шинээр өвөө нар л хөөрөг зөрүүлдэг гэж боддог байсан үе ард хоцорчээ. Өдгөө эрэгтэй, эмэгтэй, хөгшин, залуу гэлтгүй Монголынхоо уламжлалт баяр наадмуудаар хөөрөг барьж нэг нэгийнхээ амар  мэндийг мэддэг болжээ.

Хамгийн үнэтэй хөөрөг барьж хүн бүхэнд сайрхах хүсэлтэй нэгэн байхад, хорвоод хосгүй хийцтэй хөөрөг барьж хойч үедээ өвлүүлэх бодолтой нэгэн байна. Тэгвэл үнэтэй, хямд, уран хийцтэй, хийцгүй төрөл бүрийн хөөргийг цуглуулгаа болгосон эрхмүүд ч олон байдаг.

24tsag.mn энэ удаагийнхаа хоббигоороо хөөрөгтэй нөхөрлөсөн, хоббигоо болгосон хөөрөгний хорхойтнуудын цуглуулгыг сонирхуулж байна.

“Да.Ганболд”: Түүнийг Лодонгийн буриад Ганболд бас Даваадоржын Ганболд гэдэг. Түүнийг “Хөөрөгний өвчин” гэж нэрлэхэд бараг л хилсдэхгүй.  Монголын шилдэг 100 хөөрөгний каталогид Да.Ганболдын нэр дээрх хэд хэдэн хөөрөг бий. Энэ хоббиг ааваасаа өвлөж авчээ. Түүний аав Ц.Даваадорж тавиад оны үеэс л хөөрөг цуглуудаг байв. Да.Ганболдыг 10-р ангиа төгсөх үед нь аав нь гартааман хөөрөг анх бэлэглэж цуглуулга, хоббиг нь эхлүүлсэн юм.  

“Шүрэн толгойтой”: Эхнийх нь Да.Ганболдын шүрэн толгойтой их гарын тархи манан хөөрөг. Дотор тал нь өнгөлгөөтэй. XVIII зууны үеийн хийц. Хоёр дахь нь түүний эцэг Ц.Даваадоржын шүрэн толгойтой пийсүү хөөрөг. XVIII зууны сүүл үеийн хийц. 

 2000 оны эхээр “Халхын 10 цагаан” нэртэй 10 хаш хөөрөг шалгаруулсан гэдэг. Дархан аварга Бат-Эрдэнэ, УИХ-ын гишүүн Р.Гончигдорж, З.Ганболд  начин гээд олон хүн хөөргөө дэлгэж үзүүлсэн. Тэр хөөрөгний тал нь жинхэнэ хаш хөөрөг, бусад нь дээр үеэс уламжлагдаж ирсэн хөөрөгнүүд байжээ.

   Бөхийн дэвжээнээс, хурлын суудалд заларсан Б.Бат-Эрдэнэ гишүүн мөн л хөөрөгний хоббитой. Монголынхоо уламжлалт гар урлал, дархчуудын ур ухаан, шингэсэн бүтээлүүдийг сонирхдог нэгэн. Үүнд мэдээж хөөрөг, монгол гутал, зодог шуудаг зэрэг багтана. Б.Бат-Эрдэнэ гишүүн бол хэрэглээгээ хобби болгосон хүмүүсийн тоонд орно. Өөрөө эдэлж хэрэглэнэ. Бас цуглуулна.

    Аваргын нутгийн Гүрдорж гэдэг хүн түүнд 1980-аад оны дундуур цагаан хаш хөөрөг бэлэглэсэн гэдэг.  Энэ бол түүний анхны бэлгэнд авч байсан хөөрөг.  Мөн Манзушир хутагтын барьж байсан хөөрөг өвлөгдөж, зарагдаж явсаар эцэст нь Бат-Эрдэнэ гишүүнд ирсэн гэдэг. Их гарын хаш хөөрөг нь шүрэн толгойтой, алтан нуухтай юм билээ. Р.Гончигдорж гишүүнийхээс хэмжээгээр арай том. Одоо ч энэ хөөргийг барьж байгаа. Б.Бат-Эрдэнэ гишүүн, Д.Даваахүү уяач нарын хаш хөөрөг их үнэтэй эд. “Анод” банкны захирал Гүрранзын хөөрөг, талийгаач Ш.Отгонбилэгийн шүрэн хөөрөг Монголдоо хамгийн үнэтэй гэгдэж байсан үе бий. Жил ирэх тусам үнэ нь өсдөг, ямар ч эрсдэлгүй хөрөнгө бол хөөрөг.

    Эртнээс уламжилж ирсэн хөөрөг манайхны олны танил эрхмүүдэд цөөнгүй бий. Асашёрюү Дагвадоржид Манлай баатар Дамдинсүрэнгийн гайхалтай ур хийцтэй хар хөөрөг байдаг. Ихэнх хүмүүсийн мэддэг энэ хөөргөөс гадна олон арван хөөрөгний цуглуулга ч түүнд байдаг нь лавтай. Улаан загалмайн нийгэмлэгийн ЕНБД Сам дандовжид гартаамны дээд болсон “их эрдэмтэй” гэж ярьдаг солигддог зураг шиг өнгө нь хувирдаг гайхалтай хөөрөг байдаг тухай ам дамжин яригддаг. Тэр хөөргийг барьсан хүн хэзээ ч уйдахгүй хэмээн өөр хоорондоо ярилцдагаас түүний хийц, чамин содон бүхнийг мэдэж болох мэт.

    А.Сүхбат аварга хөөргөө биедээ байнга авч явдаг гэдэг. Тэгэхээр хөөрөгний ямархуу хорхойтон гэдэг нь ойлгомжтой.

    36 төрөл зүйлтэй гэр бүлийн аз жаргалыг хамгаалан, дээдсийн уур хилэнг намжаадаг гэх эртний домтой мана хөөргөөр “Макс” группийн Ерөнхийлөгч Д.Ганбаатар,  “Мон-Уран” компанийн захирал Б.Наранхүү, “Алтай констракшн”-ы  Х.Бат-Эрдэнэ нарын эрхмүүд нэг ээлжиндээ гангардаг. Тэдний мана хөөргүүд цөм шүрэн толгойтой алтан нуухтай их гарынх бөгөөд Х.Бат-Эрдэнийнх бүр Дамиран мээрэнгийн эдэлж байсан халтар мана гэдгээрээ дээдсийн хүрээнд зартай.

Нүнжиг илтгэсэн эдгээр хөөргүүд чулууныхаа чанар зэргээс шалтгаалан харилцан адилгүй үнэтэй ч дунджаар 100-150 сая төгрөгт хэлбэлцэлздэг аж. Харин “Мон-Уран”-ы Б.Наранхүүгийн мана хөөрөг хамгийн үнэтэй буюу 380 сая төгрөгийн үнэтэй. Уг хөөрөг нь 16-17-р зууны үеийн хуучны үнэт эдлэл бөгөөд түүнийг эзэмшиж байсан нэгэн томоохон лам үр, ач нартаа үе дамжуулан өвлүүлснийг Б.Наранхүү худалдан авчээ.

Энэ бол зөвхөн хөөрөгний хоббитнуудын эхлэлийг тавьж байгаа цөөхөн хэдэн хүний цуглуулга. Дараа дараагийн "хобби" буландаа бусад хөөрөгний цуглуулгатай эрхмүүдийг танилцуулах болно.