Хаврын чуулганы хугацаанд хэлэлцэх асуудлуудын талаар МАН-ын бүлгийн дарга С.Бямбацогтын байр суурийг сонслоо.

-Хаврын чуулганы хугацаанд хэлэлцэх асуудлуудад МАН-ын бүлэг ямар байр суурьтай оролцох вэ?

-УИХ дахь МАН-ын бүлэг чуулган завсарласан хугацаанд ажиллах зарчмаа тодорхойллоо. Орон нутагт ард, иргэдтэй уулзаж хууль сурталчлах ажлаа хийхийн сацуу УИХ-аар цааш хэлэлцэх асуудлууд дээр санаа бодлыг нь сонслоо. Сая УИХ-ын дарга “Хаврын чуулганаар нийгэм, эдийн засагт хэрэгтэй олон хуулийн төслийг хэлэлцэнэ” гэж хэлсэн. Үүнд: Ирээдүйн өв, сангуудийн тухай хууль, Тэтгэврийн шинэчлэл, Хүн амын бодлого зэрэг нийгмийн шинэчлэлтэй холбоотой томоохон хуулиудыг хэлэлцэнэ. Төрийн албаны тухай хууль, Монгол улсын урт хугацааны хөгжлийн бодлогын баримт бичиг, Улс төрийн намуудын тухай хууль зэргийг хэлэлцэнэ. Мөн үүнээс гадна Аж, үйлдвэрийн салбарт төрөөс баримтлах бодлогын баримт бичиг, Худалдааны тухай хууль, Үйлдвэрлэлийн тухай хуулийг хэлэлцэхээр байгаа. Таван толгой, Оюутолгой гэх ажлыг эрчимжүүлнэ. Уг асуудлаар ард иргэдийнхээ санал бодлыг сонссон. Ялангуяа сонгуулийн тухай хуультай холбогдуулж аймаг, сумдад амьдарч байгаа иргэдийн санаа бодлыг сонссон учраас тодорхой зарчмын байр суурьтай оролцоно.

-Тодорхой зарчим гэдэг нь?

-Сонгуулийн тогтолцоо нь хоёр намын Засгийн газарт хамтарсан гэрээнд заасан байгаа. Манай нам аль болох мажоритор тогтолцоо руу тэмүүлнэ. Мөн сонгуулийн саналыг хар машинаар биш гараар тоолно гэж тусгасан. Тиймээс гэрээнд заасан заалтуудаа хэрэгжүүлнэ гэж бодож байна.

-Ерөнхийлөгчийг УИХ-аас томилдог байна гэсэн  заалт холбогдох хуульд орж магадгүй гэсэн асуудал яригдаж байна. Энэ тал дээр ямар нэгэн тохиролцоонд хүрсэн үү?

-Энэ тал дээр ямар нэгэн тохиролцоонд хүрсэн зүйл байхгүй. Тодорхой асуудлыг ажлын хэсэг УИХ-д оруулж танилцуулаад бүлгээр хуралдаж байр сууриа нэгтгэнэ.
 

- Үндсэн хуульд өөрчлөлт оруулах асуудалд ямар байр суурьтай байгаа вэ?

-Үндсэн хуулийн өөрчлөлтийг зайлшгүй хийх ёстой. Өнөөдөр Төрийн бодлогыг тогтвортой явуулахын тулд тодорхой өөрчлөлтүүдийг хийх ёстой гэдэгтэй санал нэг байна. Чухам 2000 оны дордуулсан долоо өөрчлөлт гэдгээс өөрөө ямар байж болох вэ?. Энэ мэт тодорхой өөрчлөлтүүдийг хийх шаардлагатай. Хуульд өөрчлөлт оруулах ажлын хэсгийн хувьд 1992 онд Үндсэн хуулийг батлалцаж байсан гишүүдээс гол цөм нь бүрдсэн. Мөн парламентад суудалтай намуудаын гишүүд оролцсон байгаа. Сая чуулганы завсарлагаанаар Үндсэн хуульд өөрчлөлт оруулах ажлын хэсэг эрчимтэй ажилласан. Яг тодорхой ямар чиглэлээр өөрчлөлт орох нь бидэнд танилцуулагдаагүй байна.

-Таван толгойн асуудалд МАН-ын бүлэг ямар байр сууринаас хандах вэ?

-Бидэнд материал ирээгүй байна. Эхлээд материалтай нь танилцаж байж байр сууриа илэрхийлнэ. Тавантолгойн хэлэлцээр нь Монгол улсын үндэсний эрх ашигт нийцсэн байхаас гадна ард иргэдэд амалсан 1072 хувьцааг амь оруулах шаардлагатай гэж үзэж байгаа.

- УИХ-ээр хэлэлцэх ёстой гэж үзэж байна уу?

-Мэдээж энэ стратегийн ач холбогдолтой асуудал. Тиймээс УИХ-ын хараа хяналтан дор байх ёстой. Өмнөх батлагдсан хууль тогтоомжинд нийцсэн байх хэрэгтэй. Энэ асуудлыг УИХ-аар оруулж шийдэх нь улс орны эрх ашигт нийцнэ.
 

Т.Хулан