Энэ өвөл Улаанбаатар хотод ямар түлш хэрэглэх вэ, агаарын бохирдлыг бууруулах чиглэлд ямар арга хэмжээ авч хэрэгжүүлж байгаа талаар НЗД-ын нэгдүгээр орлогч А.Амартүвшин мэдээлэл өглөө. 

Тэрбээр "Есдүгээр сарын 15-наас галлагааны улирал эхэлнэ. Нийт 400 борлуулалтын цэгт сайжруулсан түлш болон хагас коксыг худалдаанд гаргана. Ирэх долоо хоногийн даваа гарагт сайжруулсан түлшний борлуулалт эхэлнэ. Харин хагас коксон түлшийг 10 дугаар сарын 1-ний өдрөөс борлуулж эхэлнэ.

Иргэд хагас кокс болон сайжруулсан түлшийг харьцуулан хэрэглэж үзэх боломжтой боллоо. Энэ жил 40-45 мянган тонн сайжруулсан түлш, 306 мянган тонн хагас коксыг борлуулалтад гаргахаар бэлтгэл ажлыг хангаж байна. Гудамж, талбайн нэгдүгээр эгнээнд буюу явган болон авто зам дагуу нүүрс борлуулахгүй. Явган болон авто замаас зайдуу борлуулалт хийхээр төлөвлөж байна.

Хагас коксын тухайд, зургадугаар сарын 13-нд тендер зарлаад 8 сарын 13 нд нээлтээ хийж 306 мянган тонн хагас кокс хэрэглэх бэлтгэл ажлыг хангаад дуусаж байна.

Бид Монгол Улсын ШУА, Химийн хүрээлэн, Хятад орос, Солонгос болон гадны лабораториор шинжилгээ хийлгэсэн. Хагас коксыг сайжруулсан түлштэй харьцуулсан лабораторийн шинжилгээний дүнд хүхэрлэг хий 89.2 хувиар, азотын хий 72.6 хувиар,  угаарын хий 24.5 хувиар, PМ2 болон РМ10 тоосонцор 68 хувиар буурсан гэх хариу гарсан. Иймд хагас коксыг хэрэглээнд нэвтрүүлэх шийдвэрийг гаргасан. 

Түүхий нүүрсийг Улаанбаатарт нэвтрүүлэхгүй. Энэ галлагааны улирлаас эхлээд Улаанбаатар хотод түүхий нүүрсийг огт нэвтрүүлэхгүй" гэв.