Хаврын чуулганаар хэлэлцэх асуудлын талаар УИХ-ын гишүүдийн байр суурийг сонслоо.
Р.Амаржаргал: "Тавантолгой"н асуудалд УИХ өөрөө хутгалдаж орох нь зөв гэдэгт эргэлэж байна
-Энэ хаврын чуулганаас ганц л зүйл хүлээж байна. Энэ нь төлөвлөсөн асуудлыг бүгдийг нь хэлэлцэж шийдвэрээ гаргах. Төлөвлөсөн ажлаа л хийж чадвал үндэсний үйлдвэрлэл, эдийн засгаа дэмжиж буй хамгийн шилдэг шийдэл. УИХ бүрэн эрхийнхээ дагуу аливаа асуудлыг хэлэлцэх эрх бий. Гэхдээ Тавантолгойн асуудалд УИХ өөрөө хутгалдаж орох нь зөв гэдэгт би эргэлзэж байна. Эцсийн эцэст бид Ерөнхий сайдаа томилсон, Засгийн газраа байгуулсан. Өөрсдийн томилсон Засгийн газар, Ерөнхий сайддаа шийдвэр гаргах боломжийг нь өгөх ёстой гэж бодож байна.
УИХ-ын гишүүн Д.Тэрбишдагва: "Тавантолгой"-г УИХ-аар хэлэлцэх шаардлагатай
-УИХ-ын хаврын чуулган үр дүнтэй байх ёстой. Энэ чуулганаар олон асуудал хэлэлцэнэ. Наадам дөхчихөөр бүх хуулиа шахаж хэлэлцэж болохгүй. Тиймээс чуулганы эхний өдрөөс ачаалалтай ажиллах ёстой. Тавантолгойн асуудлыг нухацтай хэлэлцэж ярилцахгүй бол Оюутолгойтой адилхан бүр тэрнээс ч дор болчих гээд учраас УИХ-ын даргын хэлсний дагуу УИХ-аар хэлэлцэх ёстой. Оюутолгой дээр засаж сайжруулах зүйлүүд байгаа.
Бие даагчид: УИХ-аар хэлэлцэх ёстой
Бие даагчид: УИХ-аар Тавантолгойн гэрээг хэлэлцэх ёстой. Ер нь энэ хэлэлцээр нь монголчуудын эрх ашигт нийцсэн байх ёстой.
Ж.Батзандан: Олон удаа сонгууль явуулдаг байдлыг больё гэж байгаа
-Сонгуулийн нэгдсэн хуулийн ажлын хэсгийн ахлагчаар Р.Бурмаа гишүүн ажиллаж байсан. Р.Бурмаа гишүүн сайд болсонтой холбоотойгоор ажлын хэсгийг би ахалж байгаа. Сонгуулийн хууль бол улс төрийн бүх намуудын ойлголцол, зөвшилцөл дээр гарах ёстой хууль. Яг одоогийн байдлаар улс төрийн намууд хэд, хэдэн зүйл дээр ойлголцож байгаа. Тухайлбал, олон удаа сонгууль явуулдаг байдлыг больё гэж байгаа. Орон нутгийн сонгууль, УИХ-ын сонгууль, Ерөнхийлөгчийн сонгууль, сум, дүүргийн сонгууль гэх мэт 4 жилийн дотор дахин сонгуультай нийлээд 40 гаруй сонгууль хийж байгаа. Иймээс УИХ-ын сонгууль, орон нутгийн сонгууль, аймаг дүүргийн сонгуулийг нэг өдөр хийдэг болъё гэж ярьж байна. Өнөөдөр УИХ-ын сонгуулийн системийн болон тогтолцооны асуудал дээр улс төрийн намууд бүрэн дүүрэн ойлголцолд хүрч чадаагүй байна. Намууд зөвшилцөлд хүрсний дараа энэ хууль хэлэлцэгдэнэ.
Б.Баянсэлэнгэ: Манай бүлгийн хуулиуд УИХ-ын даргын босгыг давахгүй байна
-Хаврын чуулганаар нийт 36 асуудал хэлэлцэнэ. Хэлэлцэх хууль тогтоолын төсөлд “Шударга ёс эвслийн бүлэг”-ийн санаачилсан хууль тогтоолын төсөл хангалттай ороогүй. Манай бүлгийн гишүүдээс 20 гаруй хуулийн төсөл өргөн барихад бэлэн болсон. Зарим нь өргөн баригдсан. Гэвч УИХ-ын даргын босгыг давж чадахгүй байна. Хэлэлцэх асуудлын дарааллыг УИХ-ын даргын зөвлөлөөр оруулдаг учраас бидний өргөн барьсан хуулиудыг хэлэлцэхгүй байна. Мөн Засгийн газраас санал авахаар явуулсан хууль тогтоолын төслийн санал ирэхгүй байна. Энэ чуулганаар Сонгуулийн тухай хууль, Улс төрийн намын тухай хууль, Улс төрийн намын санхүүжилтийн тухай хуулийг хэлэлцнэ. Эдгээр хууль 2016 оны сонгуулиас өмнө хэлэлцэгдэж амжих эсэх нь бидний санаа зовоосон асуудлын нэг болоод байна. “Шударага ёс эвсэл”-ийн бүлэг эдгээр хуулиудаас гадна Үндсэн хуульд өөрчлөлт оруулах асуудлыг ярьж байгаа. УИХ-ын түвшинд Үндсэн хуульд өөрчлөлт оруулах чадамжтай байна уу гэдэгт бид эргэлзэж байгаа.
Т.Хулан
