Замын хөдөлгөөний аюулгүй байдлын тухай хуулийн шинэчилсэн найруулгыг УИХ-ын чуулганаар хэлэлцүүлж анхны хэлэлцүүлэгт бэлтгүүлэхээр Хууль зүйн байнгын хороонд шилжүүллээ.

Уг хуулийн төслийг УИХ-ын гишүүн Г.Батхүү тэргүүтэй найман гишүүн санаачлан өргөн мэдүүлсэн. Уг хуулинд зааснаар бол анх удаа согтуугаар тээврийн хэрэгсэл жолоодсон иргэний авто машин барих эрхийг хоёр жилийн хугацаатай хасч, хөдөлмөрийн хөлсний доод хэмжээг хоёр дахин нэмэгдүүлсэнтэй тэнцэх хэмжээний торгууль ногдуулахаар зааж өгсөн байна. Хэрвээ хоёр дахь удаагаа тээврийн хэрэгслийг согтуугаар жолоодвол жолоо барих эрхийг дөрөв хүртэл жил хасах, хөдөлмөрийн хөлсний доод хэмжээг дөрөв дахин нэмэгдүүлсэнтэй тэнцэх хэмжээний мөнгөөр торгохоор заасан аж.

Өдөрт 80-100 иргэн согтуугаар тээврийн хэрэгсэл жолоодож яваад саатуулагддаг байна. Баяр ёслолын үеэр энэ тоо өсдөг байна.

Хууль санаачлагч Г.Батхүү “Сургуулийн өмнөх нас болон дунд сургуулийн сургалтын хөтөлбөрт замын хөдөлгөөний аюулгүй байдлын дүрмийг оруулна. Харин авто машины зогсоолыг хуульчлахгүй, салбарын хуулиар зохицуулагдана. Хөдөлгөөнд саад учруулж байршуулсан авто машиныг журамлана. Хөдөлгөөн хааж тавьсан авто машинтай холбоотой маргааны асуудлыг хуульд тусгайлан” тус хуулинд зааж өгсөн"

Монгол Улс Венийн конвенцэд тээврийн хэрэгслийн хөдөлгөөнийг баруун гар талаар явуулахаар нэгдсэн байдаг. Хуулийн төсөлд Ерөнхий сайдын дэргэд Үндэсний зөвлөлийг байгуулахаар тусгажээ. Энэ нь хүний амь нас, эрүүл мэнд, эд материалын хохирлоос хамгаалахад Засгийн газрын үйл ажиллагааг чиглүүлэн, Улсын Их Хуралд ажлаа тайлагнадаг, эргээд хянадаг тогтолцоог бий болгох юм байна.

Харин үүнийг зарим гишүүд эсэргүүцэж байна. Заавал Ерөнхий сайдын хүрээнд Үндэсний зөвлөл байгуулах шаардлагагүй гэж үзэж байгаа юм. Түүнчлэн хүүхдийг зам тээврийн осол, хэрэг зөрчлөөс хамгаалахад бага насны хүүхдийг харгалзах хүнгүйгээр замын хөдөлгөөнд оролцуулахгүй байх, хуулийн этгээдийн эрх, үүргээ биелүүлэх, тэдэнд хариуцлага тооцох механизмыг боловсронгуй болгосон тодорхой заалтуудыг тусгажээ.

Жолооч бэлтгэх асуудлыг мэргэжлийн боловсрол, сургалтын асуудал эрхэлсэн төрийн захиргааны төв байгууллага буюу Хөдөлмөрийн яам мэргэжлийн сургалтыг удирдлага зохицуулалтаар хангах зорилго бүхий төрийн бус байгууллагаар   гүйцэтгүүлэхээр зохицуулсан байна. Онолын мэдлэгийг иргэн бие дааж сурч болох, аюулгүй байдлын үүднээс дадлагыг заавал танхим, талбайд гүйцэтгэж сурдаг байх, шалгалтыг мэдлэг, дадал чадварыг эзэмшсэн иргэн боломжтой үедээ өгдөг байхаар төсөлд тусгажээ. Харин жолоочийн үнэмлэхийг улсын бүртгэлийн асуудал эрхэлсэн төрийн захиргааны байгууллага олгодог тогтолцоог бүрдүүлсэн нь олон улсын жишигт нийцсэн төдийгүй, иргэн хөнгөн шуурхай үйлчлүүлэх боломжийг бүрдүүлж байгаа аж.

Т.Энхэлээ