Баяр наадам, аялал зугаалга гээд хүмүүсийг ид амралттай байх үеэр янз бүрийн жигшүүрт хэргүүд гарч байгаа нь нууц биш. Тиймээс энэ удаад сэрэмжлүүлэг болгох үүднээс гэмт хэргийн тоймыг багцлан хүргэж байна.

Авга ахыгаа, эхнэр хүүхэдтэй нь хөнөөсөн ноцтой хэрэг гарлаа

 Төв аймгийн Сэргэлэн сумын нэгдүгээр баг Хөндлөн гэх газар 52 настай эрэгтэй Б, 11 настай эмэгтэй Б нарыг буудаж, 53 настай эмэгтэй Т хутгалж хөнөөгөөд нүхэнд булсан байсныг цагдаагийн алба хаагчид олжээ. Эх сурвалжийн мэдээлж буйгаар гэмт этгээд хэргийн газраас зугтаж Улаанбаатарт ирж архидан согтуурч явахад  цагдаагийнхан шуурхай илрүүлж баривчилсан байна. Онц ноцтой хэрэг гарсан дуудлагын дагуу Төв аймгийн цагдаагийн хэлтэс, УМБГ-ын Онц ноцтой гэмт хэрэгтэй тэмцэх хэлтсийн албан хаагчид ажиллаж хэргийг нэг хоногийн дотор илрүүлжээ. Гэмт этгээд чухам ямар учраас гурван хүний аминд хүрсэн эсэхийг тодруулахаар цагдаагийн алба хаагчид мөрдөн байцаалтын ажиллагааг үргэлжлүүлж байгаа аж.

 
Сэжигтэн этгээдийн хувьд 34 настай эрэгтэй Б гэгч аж. Уг хэрэг энэ сарын 5-нд гарсан ч энэ сарын 11-ний өдөр хэргийн талаар иргэд цагдаагийн байгууллагад мэдэгдсэн байна. Улмаар Мөрдөн байцаах газрын дэд дарга, хурандаа И.Идэрцогоор ахлуулсан ажлын хэсэг 24 цагийн хугацаанд гэмт этгээдийг илрүүлж саатуулаад байгаа юм.

 
Тэгвэл уг хэрэгт дахин 3 хүн сэжигтнээр татан шалгаж байгааг эх сурвалж мэдээллээ.

Дугуй дэлбэрч ид хийж бүтээх насандаа яваа залуу амиа алдав

Энэ сарын 12-ны өдрийн 18.00 цагийн үед Баянзүрх дүүргийн 5 дугаар хороо Монелийн автобус базад “ДЮЦ” компанийн буруутай үйл ажиллагаанаас тус компанид засварын ажилтай А гэгч амь насаа алджээ. Тодруулбал, “ДЮЦ” компани нь хөдөлмөрийн аюулгүй байдлыг хангаагүй, зориулалтын бус техник төхөөрөмжөөр дугуй хийлүүлж байсан аж. Улмаар дугуйг хийлж байхад дугуй дэлбэрч, нуух төмөр нь толгойн тус газар нь цохиж аминд нь хүрчээ. Дугуй хүчтэй дэлбэрсэн учраас талийгаач А-гийн нүүрэн хэсэг цөмөрсөн байна.

 
Талийгаач А нь 23 настай байсан бөгөөд дөрвөн сартай хүүхэдтэй байжээ. Ийнхүү нэгэн компанийн буруутай үйл ажиллагаанаас болж, эхнэр нь дөрвөн сартай хүүхэдтэйгээ өнчирч үлдлээ. Иймд холбогдох газруудаас компаниудад хөдөлмөрийн аюулгүй байдлаа хангаж ажиллаж, ахиж эрдэнэт хүний амь насанд хүрэхгүй байхыг анхааруулсаар байна.
 

Уг хэргийг Баянзүрх дүүргийн цагдаагийн хоёрдугаар хэлтэст үргэлжлүүлэн шалгаж байна.

Авиралт хийж яваад осгож амиа алдсан харамсалтай хэрэг гарлаа

Баян-Өлгий аймгийн Цэнгэл сумын Хар-Уул багийн “Алтай таван богд” ууланд авиралт хийж байсан 5 залуу амиа алдсан харамсалтай хэрэг гарсан.

Алтай Таван Богд ууланд авиралт хийсний 100 жилийн ой тохиож байгаа бөгөөд үүнд зориулсан авиралтад Монголын өнцөг булан бүрээс, хилийн чанадаас олон уулчин, клуб нэгтгэлээс зохион байгуулж авиралт хийсэн нь ийм аюул дагуулсан билээ.

Амиа алдагсдын ар гэрийнхэн хийгээд ард иргэд  Шадар сайд У.Хүрэлсүхийг идэвхтэй ажиллаагүй, яахын аргагүй учир дутагдалтай ажилласнаас тэдэнд тусламж үзүүлж чадсангүй гэж үзэж байгаа юм.  

Усанд живж амиа алдах тохиолдол эрс нэмэгдэв

Баяр наадмын үер олон арван залуус, хүүхэд, хөгшчүүд усанд осолдож амиа алдлаа. Тухайлбал,  энэ сарын 14-нд Өмнөговь аймгийн Даланзадгад сумын 7 дугаар багийн 32 настай иргэн Б гэрээсээ гараад сураггүй болсон талаар дуудлага ирүүлжээ. Үүний дагуу тус аймгийн Онцгой байдлын газрын 46 албан хаагч, Цагдаагийн газрын 9 албан хаагч, ар гэрээс нь 16 иргэн эрэн хайх ажиллагааг зохион байгуулж байгаа аж.

Мөн Хөвсгөл аймгийн Мөрөн сумын Элст багийн Дэлгэрмөрөн голын усанд найман настай М живлээ гэсэн дуудлага энэ сарын 16-нд ирсэн байна. Үүний дагуу Хөвсгөл аймгийн Онцгой байдлын газрын 4 албан хаагч, орон нутгаас 15 иргэн эрэн хайх ажиллагааг зохион байгуулж байна.

 
Мөн Нийслэлийн Сонгинохайрхан дүүргийн 20 дугаар хороо, Хөөсөнцөрийн үйлдвэрийн баруун талд тогтоол усанд хүн живлээ гэх дуудлагын дагуу Аврах ангийн 6 албан хаагч шуурхай ажиллаж, 14 настай З-ийн цогцсыг гарган авч цагдаагийн байгууллагад хүлээлгэн өгсөн байна.

Орон нутгийн замд хүнээр “тахил өргөх нь” хэтэрлээ

Сэлэнгэ аймгийн нутагт Старекс маркийн авто машин онхолдож 3 хүн нас барсан байна.  Мөн     Сэлэнгэ аймгийн нутагт Лексүс маркийн авто машин онхолдож 2 хүн нас баржээ.    Дорноговь аймгийн нутагт Ландкрузер маркийн авто машины жолооч Г нь явган зорчигч М-ийг дайрч амь насыг нь хохироосон байна.    Багануур дүүргийн нутаг дэвсгэрд Приүс маркийн авто машин онхолдож 1 хүн нас барсан.    Хөвсгөл аймгийн нутаг дэвсгэрт Корса маркийн авто машин онхолдож 1 хүн нас барсан талаар Замын цагдаагийн газраас мэдээллээ.

 
Түүнчлэн энэ сарын 12-ны өдөр   ХУД-ын нутаг Яармагийн замд "Старекс" маркийн авто машины жолооч Э-нь явган зорчигч М-ийг дайрч амь насыг нь хохироосон осол гарчээ.

Дээрх осол хэргүүд бол зөвхөн баяр наадмын үеийн цөөхөн хэдэн жишээ. Энэ мэт Хөвсгөл, Дорнодоос эхлээд орон нутгийн замуудад хурд хэтрүүлж, сонор сэрэмж болгоомжоо алдсанаас үүдэлтэй хэргүүд ихээр гарав.

Д.Дуулим