Өнгөрсөн баасан гаригт Эрүүгийн цагдаагийн газрын Төлөвлөлт, зохион байгуулалтын хэлтсийн алба хаагчид салхинд гарч амрахаар амралтын газарт очихдоо хоорондоо маргалдаж, нэг алба хаагч амиа алдсан ноцтой хэрэг гарчээ.  Өдгөө нэгнийхээ аминд хүрсэн гэх алба хаагчийг саатуулан, хэргийг УМБГ-т шалгаж эхэлсэн байна. Тодруулбал,  уг хэргийн улмаас 1975 онд төрсөн Х нас барсан. Харин хэргийг үйлдсэн  гэх 1985 онд төрсөн Ө гэгчийг саатуулан УМБГ-т шалгаж байна.

Алба хаагчид "Горхи-Мэлхий хад" амралтын газарт амарч байсан байна.  Энэхүү амралтын газар нь Налайх дүүргийн зургадугаар хорооны нутаг дэвсрэгт байрладаг. Гаалийн ерөнхий газрын харьяанд байдаг амралтын газар гэдгийг эх сурвалж мэдээлж байна.

Албаны эх сурвалжаас тодруулахад "Хэрэг энэ сарын 9-10-нд шилжих шөнө гарсан. Цагдаагийн алба хаагчид ажлын бус цагаар Налайх дүүргийн 6 дугаар хорооны нутаг дэвсгэрт амрахаар очсон байгаа юм. Улмаар нэг алба хаагч харамсалтайгаар амиа алдсан хэрэг гарсан. Хэргийн мөрдөн байцаалтын ажиллагаа дөнгөж эхэлж байна. Тиймээс дэлгэрэнгүй мэдээлэл өгөх боломжгүй" гэсэн юм.

Мөн энэ тухай талийгаач Х-гийн хүү өөрийн фэйсбүүк хуудаснаа бичжээ. Тэрбээр "Монголын цагдаа аавын минь аминд хүрч бидний амьдралыг сүйтгэлээ. Аав маань цагдаагийн байгууллагад 23 жил ажиллаж цагдаагийн ерөнхий газрын харьяа эрүүгийн цагдаагийн газарт ажиллаж байгаад онц хэрцгийгээр алуулж нас барлаа. Аав маань сумын цагдаагаас сумын хэсгийн төлөөлөгч, аймгийн цагдаа болон Баянгол дүүргийн цагдаагийн хэлтэсд ахлах мөрдөн байцаагч, эрүүгийн цагдаагийн газарт ахлах нууцын мөрдөн байцаагчаар ажиллаж байсан. Аавыг минь алсан цагдаагийнхнаас аавынхаа амийг нэхэж байна" гэжээ.

Д.Ундрах /24tsag.mn/