Манай улсад байж боломгүй шударга бүс зүйл ил, далд хэлбэрээр газар авч байгааг илтгэх нэгэн хэрэг гарчээ. Тодруулбал, Монголын гурван иргэн Өвөрмонгол иргэн В гэгчийг дарамталж долоо хоног хууль бусаар цагдан хорьсон хэрэг гарсан талаар бид мэдээлсэн.

Ингэхдээ бүр Гадаадын иргэн харьяатын асуудал эрхлэх газрын өрөөнд хорьж цагдан, мөнгө нэхэж дарамталсан асуудал өдгөө хууль хяналтын байгууллагаар шалгуулж байгаа юм.

Эх сурвалжийн мэдээлж буйгаар Өвөрмонгол иргэнийг саатуулж, цагдан хорьж, дарамталсан гэх монгол иргэд Гадаадын иргэн харьяатын асуудал эрхлэх газрын алба хаагчид байж болзошгүй аж.
Учир нь албан байгууллагын тасалгаанд хорьж цагдаж байсан бичлэг нотлох баримт болж цагдаагийн байгууллагад хүргэгджээ.

В-гийн хувьд Монгол улсад нэг сарын хугацаатай аялал жуулчлалын визээр ирээд байсан аж. Гэтэл монгол иргэд түүнээс 50 сая төгрөг нэхэж ийн 7 хоног саатуулж, дарамталжээ.

Эх сурвалжийн мэдээлснээр, түүнд өдөрт жаахан хоол өгч, “Мөнгөө өг” хэмээн дарамтлан, мөнгө байхгүйгээ хэлэхээр буцааж өрөөнд оруулан цоожилж байсан аж. В гэх өвөрмонгол тэдгээр залуусаас хэрхэн салсан нь тодорхойгүй байна.

Д.Ундрах /24tsag.mn/