“Эрдэнэс Тавантолгой” компанийн Үйлдвэрчний эвлэлийн дарга С.Эрдэнэ өөрийгөө шатаахыг завдав. Тодруулбал, тус компанийн ажилчид өнөөдөр Үндэсний мэдээллийн төвд удирдлагуудынхаа эсрэг мэдээлэл хийсэн юм.

Энэ үеэр тус хэрэг гарсан бөгөөд  ҮЭ-ийн дарга  С.Эрдэнэ хэвлэлийн хурал хийх үеэрээ “Эрдэнэс таван толгой” компанийн удирдлагууд ажилчдыг шилжүүлэх гэрээг англи хэлээр хийсэн. Дахиад 200 гаруй ажилтанг халах гэж байгаа. Залуучуудын өмнөөс би хариуцлага үүрнэ” гэж мэдэгдэл хийснийхээ дараа өөр рүүгээ бензин цацаж гэнэт шүдэнз зурсан юм. Гал яах ийхийн зуургүй асч, газар авсан ч хамт мэдээлэл хийсэн хүмүүс ус цацаж, хувцсаараа цохиж унтраалаа.

Үндэсний мэдээллийн төв нь битүү утаанд хучигдсан байгааг та бүхэн доорх зургаас харж болно. С.Эрдэнийн биеийн байдал харьцангуй гайгүй байгаа бөгөөд хөл, гар, мөн нүүрний зарим хэсэг түлэгджээ. Түүнд эмнэлэгийн тусламж хүргэхээр 103 төв рүү авч явав.

 Эрдэнэс ТТ компанийн удирдлагууд ажилчдынхаа хөдөлмөрийн гэрээг хууль бусаар дур мэдэн өөрчилж, Хятадын компани руу шилжүүлэхээр болсныг эсэргүүцэж өмнө нь мэдээлэл хийж байсан билээ.

Т.Энхэлээ