“Эрдэнэс Тавантолгой” компанийн Үйлдвэрчний эвлэлийн дарга С.Эрдэнэ өөрийгөө шатааж олныг сэрдхийлгэв. Хэдийгээр түүний энэ үйлдэл амь наснаас нь холуур өнгөрсөн ч тэрбээр биедээ түлэнхийн бэртэлтэйгээр эмнэлгийн байгууллагад хүргэгдэв.

Түүний энэхүү үйлдлийг хүн бүр янз бүрээр ойлгож, үзэл бодлоо илэрхийлж байна.

Зарим иргэдийн хувьд энэ хүнд үүнээс өөр тэмцэх арга зам байсангүй мэтээр ярьж байгаа бол нөгөө хэсэг нь хэтэрхий “тэнэглэл”  хэмээн үзэл бодлоо цахим ертөнцөд илэрхийлсээр байна.

Юутай ч түүний энэ үйлдлээс болж багагүй асуудал дэгдэх нь ойлгомжтой болоод байна. Магадгүй энэ асуудлаас улбаалж манай улсын хуулийн гажуудал ч илэрхий харагдаж байгааг хэлэх нь зүйтэй биз ээ.

Тухайлбал, амиа хорлохыг завдсан хийгээд бусдын амгалан тайван байдлыг алдагдуулж, олон нийтийн газар үзэл бодлоо тулган шаардсан  дээрх үйлдэлд хүлээлгэх хариуцлагын талаар хуулинд тусгаж өгөөгүй байгаа юм.

Харин бусдыг амиа хорлоход хүргэсэн буюу Эрүүгийн хуулийн 95.1-д зааснаар “Эрдэнэс Тавантолгой” компанийн удирдлагуудад эрүүгийн хэрэг үүсгэх боломжтой болж байна.

Өөрөөр хэлбэл, С.Эрдэнэ гэгч зааснаар “Эрдэнэс Тавантолгой” компанийн удирдлагуудад эрүүгийн хэрэг үүсгэх нөхцлийг бүрдүүлсэн гэж хэлж болно.

Мөн цаашлаад ийм асуудал дахин давтагдахгүй байхыг үгүйсгэхгүй. Гэтэл цагдаагийн алба хаагчид иргэдийн амгалан тайванг алдагдуулахгүй, хамгаалах үүрэгтэй улс. Тэгэхээр тэд хэвлэлийн хурал бүр дээр очиж хамгаалалтанд гарч, хурал зохион байгуулагч хийгээд сэтгүүлчдийг нэгжиж шалгаж оруулж байх ёстой юу.

Эрх үүргийнхээ дагуу хэвлэлийн хурлын аюулгүй байдалд анхаарч ажиллалаа гэхэд өнөөх үг хэлээ чөлөөтэй илэрхийлэх, хэвлэн нийтлэх гэх мэт хүмүүсийн эрх ашиг зөрчигдөх бус уу.

Энэ мэт асуудлууд урган гарч буйг учир мэдэх хүмүүс хэлж байна. Ер нь үзэл бодлоо илэрхийлж болно. Гагцхүү ингэж гэмт хэргийн чанараар буюу өөрийн үзэл бодлыг хүчээр тулган шаардах замаар илэрхийлж байгаа нь зөв үү?

Юутай ч өнөөдрийн энэ асуудал цагдаагийн байгууллагаар шалгагдахын хувьд шалгагдаж байна. С.Эрдэнийн хамт мэдээлэл хийсэн хоёр иргэнээс байцаалт аваад эхэлсэн аж. Гагцхүү хуулийн ямар зүйл заалтаар шалгагдах нь тодорхойгүй байгаа юм.

Дашрамд хэлэхэд, өөрийгөө шатаасан С.Эрдэнийн биеийн байдалд анхаарахыг Шадар сайдад даалгасан байна. Мөн эмчилгээний бүх зардлыг "Эрдэнэс Тавантолгой" компанид хариуцуулжээ.

Д.Дуулим