Ардчилалын анхдагчдын нэг С.Зориг агсны хэргийн талаарх мэдээллийг нийгмийн зарим хэсэг бүлгийнхэн эргэн сануулж эхэллээ.

С.Зориг агсан зуурдаар нас бараад өдгөө 16 жил өнгөрчээ. Энэ хугацаанд түүний хэрэг илрээгүйн дээр сэжигтэн этгээдийг ч олсонгүй. Гэсэн хэдий ч  уг хэрэг олны анхаарлын төвд байсаар... Магадгүй цагдаагийн даргыг улс төрийн хүчин, нам эвслээс томилж байгаа цагт энэ хэрэг илрэхгүй байж ч болох юм.

Мөн С.Зоригийн хэрэгт ач холбогдлоо өгч чадах нотлох баримтууд ч эхнээсээ устаж байгаа гэдэгт ард иргэд эргэлзэхгүй байгаа юм. Гэвч С.Зориг агсны аминд хүрсэн этгээдийг нэг л өдөр олж, хэрэг явдлын цаад учир шалтгааныг тогтооно гэдэгт олон нийт итгэсээр...

Цаашлаад С.Зоригийн үхэлд хэн буруутай байж болохыг ч хүн бүр дор бүрнээ тунгаасаар. Таамагласан, сэжиглэсэн этгээдүүд байгаа ч хуулийнханд итгэж хүлээсээр. Ийм л байдалтайгаар цаг хугацаа өнгөрсөөр байна.

Тэгвэл нам жим байсан уг хэрэг дахин сөхөгдөж эхэллээ. Учир нь энэ амралтын өдрүүдэд С.Зоригийн эхнэр Д.Булганыг цагдан хорьсон гэх мэдээлэл хөврөх боллоо. Баттай эх сурвалжаас тодруулахад шалгаж байгаа нь үнэн гэж байгаа ч яг ямар хэрэгт сэжиглэн саатуулсан нь тодорхойгүй байна.

Өөрөөр хэлбэл, ямар шалтгааны улмаас, хаанаас саатуулж хорьсон болох нь одоогоор тодорхойгүй байгаа юм.

Өнгөрсөн жилүүдэд Д.Булганыг С.Зоригийн хэрэгт оролцоотой хэмээн сэжиглэж байсан. Тэгвэл гадаад цагаачилсан гэж байсан Д.Булган Тэрэлжид  жуулчны бааз эрхэлдэг аж. Хэрэг хаагдаагүй учир тэрбээр гадаадад чөлөөтэй зорчих эрх нь хязгаарлагдмал байгаа гэнэ. Өнөөдрийг хүртэл хэрэг нь илрээгүй байгаа С.Зориг агсны аллагын ганц гэрч гэгддэг, түүний эхнэр Д.Булган хэмээх энэ хатагтайн талаар хүмүүс янз бүрээр л ярьдаг.

Юутай ч Д.Булганыг саатуулагдсан гэдгийг сонссон иргэд хийгээд УИХ-ын гишүүд санал бодлоо цахим ертөнцөд илэрхийлсээр байна. Тухайлбал, УИХ-ын гишүүн О.Баасанхүү твиттер хуудсандаа  "С.Зоригийн хэрэг тун удахгүй илэрнэ гэж итгэж байна" гэжээ. Харин зарим иргэдийн хувьд энэ хэргийг дахин сөхөгдөж, үнэн учир нь тайлагдана гэдэгт итгэж байснаа илэрхийлж  байгаа юм.

Дашрамд хэлэхэд, Д.Булгантай хамт Эрдэнэтээс хоёр иргэнийг шалгаж байгаа талаарх "бор шувуу" нисч байна.  Чухам хэн гэгч, ямар учраас шалгагдаж эхэлсэн нь тодорхойгүй байгаа ч бид энэ хэргийн эргэн тойрон дахь мэдээллийг цаг алдалгүй хүргэх болно.

Тэгвэл “Монгол тулгатан” нэвтрүүлгээрээ алдаршаад буй “Херо” энтертайментийн хамт олон С.Зоригийн аллагын талаарх бүрэн хэмжээний баримтат киног үзэгчдэд хүргэхээр бэлтгэж байгаа гэнэ. Энэ талаар “Херо”-гийн Б.Баатар найруулагч өөрөө үг цухуйлгаж суух юм. Тэд киногоороо С.Зориг агсны аллагын талаар харуулаад зогсохгүй С.Зориг гэж ямар хүн байсан талаар Монголын ард түмэнд эргэн сануулах аж. Тэд ажлаа зоригтойгоор аль хэдийнэ эхэлжээ. Гагцхүү хэзээ төгсгөлөө хийж, “ямар цаг хугацаа”-нд ард иргэдэд хүргэх нь л тодорхойгүй байгаа юм. Тэдний бүтээлээс олон зүйлийн учир тайлагдаж,  цоожтой хаалганы цаана буй далд зүйлс ч ил гарч магадгүй юм.  Чухамхүү  эл баримтат киног “төрөхгүй” байгаасай гэж хүсэгчид л  уран бүтээлчдэд ямар нэг саад хийж, утга санаанд нь өөрчлөлт оруулчихгүй бол кино бүтсэн даруйдаа олны хүртээл болох биз ээ.

Д.Булганыг саатуулсан гэх шум тарахаас өмнө зохион байгуулалттайгаар, урьдаас төлөвлөж С.Зоригийн талаар хөндөж байсан. Ингэж хэлэхээр иргэн та магадгүй гайхшрах байх. Гэвч энэ бүхэн үнэн. “ТВ2” сувгийн бэлтгэн гаргадаг, сэтгүүлч Л.Мөнхбаясгалангийн олноо хүргэдэг “Цензургүй яриа” нэвтрүүлгийг та бүхэн надаар хэлүүлэлтгүй мэднэ. Тэгвэл энэ нэвтрүүлэг С.Зориг агсаны талаар гэндүүлсхийн хөндөөд байгааг та анзаарсан уу?. Тодруулбал, УИХ-ын гишүүн Ц.Нямдорж, Хотын дарга Э.Бат-Үүл нарыг зочноор урин оролцуулахдаа С.Зоригийг орхигдуулсангүй. Нэвтрүүлэгч асуултаа ч тавьж, тэд хариултаа ч хэлсэн.  

Энэ бүхнээс харахад “Женко” Баттулгын “фракц” С.Зоригийн аллага, түүний түүхэн замнал, тайлагдашгүй бүхэн рүү шимтэн оржээ. Учир нь “Херо” энтертаймент, “Цензургүй яриа” зэргийн цаад эзэн нь Х.Баттулга. Түүний нөлөө, түүний удирдлага байгаа гэдгийг ч олон нийт харж байгаа. Тэгэхээр С.Зоригийн аллагын талаарх олон асуултын хариуг Х.Баттулга олон нийтэд дэлгэхээр шийдсэн нь дээрх үйлдлүүдээс харагдаж байгаа юм. Х.Баттулга хийгээд түүний нөхөд аль хэдийнэ мориндоо морджээ. Гагцхүү хэр хурдан давхиж олон түмний анхаарлыг татах вэ гэдэг нь л сонин. Гэхдээ зөвхөн баримтанд тулгуурсан үнэн л чухал. Энэ бүхнийг “Херо”-гийнхон яаж гаргаж ирэх бол?. Магадгүй энэ баримтат кино нийгмийг донсолгочиж мэдэх юм.

Нэгэнт С.Зоригийн талаар  хөндөж байгаа хойно уг хэрэгт холбогдсон хүмүүс нэг, нэгээрээ хэрхэн амиа алдсан талаар энд сануулья. Магадгүй тэд аливаа хэргийн гэрч байх аминд ч аюултай гэдгийг Монголын ард түмэнд ойлгуулсан ч байж мэдэх юм.

С.Зоригийн хэргээс хойш энэ хэргийн улмаас амиа алдсан байж магадгүй гэх хүн амины хэрэг нэлээдгүй байгаа. Эдгээр амиа алдагсад бүгдээрээ ямар нэг сэжмээр С.Зориг агсны хэрэгтэй холбогддог.  Олон нийтэд ил болсон тоймтой хэдээс нь дурьдвал:

1.    УИХ-ын гишүүн С.Эрдэнийн эхнэр 4 давхраас унаж нас барсан. Энэ эмэгтэй С.Зоригийн хэрэгт сэжиглэгдэж шоронд сар гаран суугаад гарсан гэдэг. Амиа хорлох үйлдэл байв уу, гэрчийг устгагсад түүнийг түлхэв үү?

2.    Хэргийн газар анх очиж талийгаачийн эхнэр Д.Булганаас байцаалт авч, үзлэг хийсэн цагдаагийн хошууч усанд унаж нас барсан.  Хэргийг осол гэж үзээд хаасан.

3.    Алуурчид хэргээ гүйцэлдүүлээд гэрээс нь гараад шатаар уруудан гүйж байхыг харсан хоёр залуугийн нэг болох Б хэмээх залуу нас барсан. Түүнийг тамлаж алсан гэдгийг эх сурвалжууд хэлдэг.

4.    Орцны өмнө хоёр алуурчныг гарч ирэхэд нэгийг нь таниад “Болдоо” хэмээн нэрээр нь дуудсан нэгэн буюу “маш чухал гэрч” учир битүүлгээр сураг алдарсан.

5.    Дээрхи мэдээллийн мөрөөр Болд гэдэг хүнийг эрэн сурвалжилсаар олоход өнөөх нь цагдаагийн ахмад цолтой нэгэн байсан бөгөөд Дарханд хэдийнэ хөлдөж үхсэн байсан гэдэг. Ингээд цогцосыг шарилаас нь ухан гаргаж шүүх эмнэлгийн үзлэгт оруулахад хөлдөж биш гадны нөлөөтэй нас барсан болох нь тогтоогдсон.

6.    Дарханы цагдаагийн ахмад бусдад хэрцгийгээр алагдсан. Энэ хүн С.Зоригийн хэрэг дээр ажиллаж байсан.

7.    Хоёр алуурчныг харсан, бас тээвэрлэсэн байж болох  таксины жолооч мөн сураг алдарсан.

8.    Хэргийг хянаж байсан прокурор Дарийжав учир битүүлэг шалтгааны улмаас амиа алдсан.

Энэ мэтчилэн учир битүүлэг үхлүүд ар араасаа цуварсаар лавтай 17 хүрсэн гэдгийг тагнуулын эх сурвалж тухайн үед өгүүлж байсныг сошиал ертөнцөд дэлгэжээ.

Д.Дуулим