С.Зориг агсны амийг хөнөөсөн хэрэгтэй холбоотой шинэ нөхцөл байдал үүсч сүүлийн өдрүүдэд олны анхаарлыг ихээхэн татаж байна. Энэ нь С.Зориг агсны гэргий Д.Булганыг баривчлан саатуулсан үйл явдалтай холбоотой. Өнгөрсөн амралтын өдрүүдэд Д.Булганыг Цагдаагийн газраас баривчилсан гэх мэдээлэл хэвлэл мэдээллийн хэрэгслүүдээр гарсан. Олон нийт уг асуудалд анхаарлаа хандуулж эхэлмэгц ЦЕГ-аас мэдээлэл хийж “Д.Булганыг баривчилсан нь үнэн. Гэхдээ ямар хэргээр баривчилсаныг нь хэлэх боломжгүй” гэх тайлбарыг хэлсэн юм.

Үүнээс хойш С.Зориг агсаны хэрэгтэй холбоотой түүний үйл хэргийг дурссан олон мэдээ, мэдээлэл хэвлэлүүдээр гарав. Зарим нь “Сонгууль дөхсөн учраас С.Зоригийн хэргээр шоу хийж байна” гэж байсан бол нэг хэсэг нь “Д.Булганыг нөхрийнхөө аллагын хэрэгтэй холбоотой буруу мэдүүлгийг байцаалтын туршид өгсөн. Түүнийг нөхрийнх нь хэрэгт холбогдуулан шалгаж байна” гэх хардлагыг өрнүүлж байлаа.

Харин энэ бүх хугацаанд талийгаач С.Зориг агсны дүү УИХ-ын гишүүн С.Оюун ганц ч тайлбар хийлгүй чимээгүй байсан юм. Түүнийг сэтгүүлчид төрийн ордноос хайгаад олоогүй бөгөөд хэд хоног ажил дээгүүрээ үзэгдээгүй. Утас руу нь залгахаар авахгүй, мессежинд хариу өгөхгүй байдалтай байлаа. Уг нь түүний үг нийгэмд хамгийн жинтэй тусах байв.

Тэгвэл УИХ-ын гишүүн С.Оюун уг хэргийн талаар сая нэг тайлбар хийв. Тэрбээр “Бид хохирогч. Тийм учраас хэрэг илрээсэй гэж хүсэж байна. Холбогдох байгууллагаас нь мэдээлэл авсан нь дээр байх. Хамаагүй зүйл ярьвад би загнуулна шүү дээ” гэлээ.

Т.Энхэлээ