“Эрдэнэс Тавантолгой” компанийн “Эв санааны нэгдэл” үйлдвэрчний эвлэлийн дарга С.Эрдэнэ өөрийгөө галдсан хэрэг гарсан. Тэрбээр одоо ГССҮТ-ийн Түлэгдэл, нөхөн сэргээх тасагт эмчлүүлж буй. Одоогоор биеийн байдал нь хүнд, хордлого тайлах, үрэвсэл дарах эмчилгээ хийлгэж байгаа аж. Тэрбээр өчигдөр эхний мэс засалд орсон байна. Дахин хоёр хагалгаанд орно гэж эмч нар хэлжээ.

Мөн “Эрдэнэс Тавантолгой” компани эмчилгээний төлбөрийг 100 хувь гаргана гэж байсан ч тэгээгүй гэдгийг С.Эрдэнийн эхнэр Ш.Хишигт ярив. Ш.Хишигт ярихдаа “Бид өөрсдийнхөө хөрөнгөөр эмчилгээг хийлгэж байгаа. “Эрдэнэс Тавантолгой” компаниас 800 гаруй мянган төгрөгийн эм тариа боолт авч өгсөн. Тэр нь хоёр өдрийн эмчилгээний зардал. Яахав, Солонгос руу явуулах аман хүсэлт ирсэн. Тэр нь одоогоор шийдэгдээгүй байна” гэлээ.

Т.Энхэлээ