Амралтын өдөр болсон МАН-ын Бага хурал халуухан болно гэсэн хүлээлт байлаа. Ажиглагчид "МАН Засгаас хөөгдөж гарснаас хойш Бага хурал нь болоогүй. Халуухан үйл явдал олон болно. МАН-ыг Засагт орохыг буруутгадаг гишүүд нь сэлэм эргүүлж, хурлын уур амьсгалыг хүндрүүлнэ. Дээр нь М.Энхболд, С.Баяр, С.Батболд, Ө.Энхтүвшин, У.Хүрэлсүх нарын харилцаа хүйтэрсэн. Энэ байдал Бага хурлаараа илрэн гарна. Сонгуульд нэр дэвших, албан тушаал очихыг хүсдэг хэсгүүд амбицлана" гэх мэт олон тойм төсөөллийг төсөөлж байсан. Бас МАН дотор үүссэн "Ардын хүч"-ийнхэн ч чимээгүй суухгүй. НАМЗХ-ны шинэчлэлийг тойрсон маргаан тасраагүй. Энэ бүхэн МАН-ын Бага хурлын уур амьсгалыг эвгүй болгоно гэсэн таамаглал гарч, үүнд олон хүн анхаарлаа хандуулж байлаа.

Тэгвэл ажиглагчид, улс төр судлаачдын таамаглаж байсан шиг үйл явдал болоогүй талаар эх сурвалжууд мэдээлж байна. Ямар нэгэн маргаан мэтгэлцээн, хэрүүл тэмцэл гарсангүй. Дотоод асуудлаа яриад, хэдэн тогтоол батлаад, намын дарга нь улс төрийн илтгэл тавьж нийгэм эдийн засагт үнэлгээ өгөөд тарчихлаа.

Анхаарал татсан нэг зүйл болсон нь МАН-ынхан Удирдах зөвлөлийн бүрэлдэхүүнээ 10 хүнээр нэмэгдүүлсэн явдал юм. Энэхүү 10 хүний бүтэц бүрэлдэхүүн л нилээд тооцоо бодуулахаар байна. Тухайлбал НАМЗХ, НАМОХ, НАМЭХ, Ахмадын холбоо гэсэн бүтцийн дөрвөн төрийн бус байгууллагынхаа дарга нарыг Удирдах зөвлөлдөө багтаалаа. УИХ дахь бүлэг, нийслэл дэх бүлгийн удирдлагууд ч Удирдах зөвлөлдөө оров. Ингэснээр МАН бүтцийн бүх байгууллагаа мэдээллээр хангах, Удирдах зөвлөлийн шийдвэр бүх шатандаа очих бүтцийг хийчихэж байна. Бас өмнө нь хариуцлагаа хүлээгээд явсан Сү.Батболд, Ө.Энхтүвшин, У.Хүрэлсүх, Г.Занданшатар гэсэн экс дарга, Ерөнхий нарийн бичгийн дарга байсан хүмүүсээ Удирдах зөвлөлдөө уриад оруулчихлаа. Илүү ч үгүй, дутуу ч үгүй 10 бүрэлдэхүүнээр Удирдах зөвлөлөө өргөтгөлөө. Эдгээр хүмүүсийг хэн ч үгүйсгэж чадаагүй байна. Харин ч М.Энхболд даргынхаа энэ шийдвэрийг гишүүд нь таатай хүлээж авчээ.

Үүний харсан хүмүүс  МАН 2016 оны сонгуульд зориулсан бүтцийг байгуулчихлаа. Энэ бүтэцдээ бүх төрийн бус байгууллагын удирдлагууд орлоо. Бас сонгуульд ялж, ялагдаж туршлага сууж, зовлон жаргалыг үүрч явсан туршлагатай экс дарга нараар багаа бүрдүүлж байна гэж ярьж байна.

Уг нь М.Энхболд, С.Баяр, Сү.Батболд, У.Хүрэлсүх, Ө.Энхтүвшин нарын харилцаа хандлага нилээд хүйтэрсэн гэж сүүлийн нэг жил гарангийн хугацаанд хэвлэлээр шуугисан. Нэг талд М.Энхболд гараад нөгөө талд нь бусад нь нийлчихсэн гэсэн цуурхал явсаар ирсэн. Тэдний хоорондын хүйтэн харилцаа МАН-ыг тараах хэмжээнд хүрнэ гэж зарим нь дөвийлгөж дүгнэн олны анхаарлыг татаад байсан. Тэгвэл дээрх үйл явдал "МАН-ын удирдлагууд түнжин хагарсан" гэсэн мэдээллийг үгүйсгэж орхив.   "Олгой хагаравч тогоон дотроо" гэдэг шиг МАН-ынхан түнжин хагарсан байлаа ч гэсэн АН-ынхан шиг зөрчил тэмцлээ нийгэмд гаргасангүй. МАН-ын яг энэ зангаас АН суралцмаар. Өнгөрсөн хугацаанд М.Энхболд, С.Баяр, Сү.Батболд, У.Хүрэлсүх, Ө.Энхтүвшин нарын хэн нь ч зөрчилтэй байгаа тухайгаа ам нээж ярьсангүй. Ийм яриа хэвлэлийн хуудаснаас олдохгүй. Тэгэхэд АН-ынхан фракцийн эрх ашгаасаа болж ард түмний өмнө алалцаж байна.

Сөрөг хүчин сонгуулийн өмнө ингэж нэгдэн нягтарч байхад эрх баригч АН-ынхан хэдэн хэсэгт тарчихаад бараг л өдөр бүр бие биенийхээ эсрэг сюрприз дэлгэж байна. АН-ын дотоод зөрчил Ардчилсан намыг өөрийг нь бас Монгол орныг тамирдуулж эхэлсэнийг олон хүн шүүмжлэх болсон. Ийнхүү Монголын хоёр том намын нэг нь нэгдэж, нягтарч байхад нөгөө нь тарж бутарсан хэвээр л байна.

Т.Хулан