УИХ дахь Эдийн засгийн байнгын хорооны хуралдаанаар орон сууцны 8 хувийн зээлийн хүүг зогсоосон асуудлыг хэлэлцээд уг асуудлаар Эдийн засгийн байнгын хороо, Хууль зүйн байнгын хорооны хамтарсан ажлын хэсэг байгуулж,  нарийвчлан хэлэлцэхээр боллоо. Уг асуудлыг хэлэлцэх үеэр Монгол банкны Ерөнхийлөгч Н.Золжаргал болон УИХ-ын гишүүд ямар байр, суурийг илэрхийлснийг хүргэе.

Барилга, хот байгуулалтын сайд З.Баянсэлэнгэ: -10 хувийн урьдчилгаатай зээлийг хоорондоо тохиролцоод явуулах бүрэн боломжтой гэж үзэж байгаа. Яагаад гэвэл арилжааны банкин дээр аж ахуй нэгж өөрөө өндөр хүүтэй зээл авчихсан байгаа учраас тэр өндөр хүүтэй зээлийг багасгаад 8 хувийн ипотекийн зээлэнд оруулах, 20 хувь дээрээ өөрсдөө баталгаа гаргаад эргэн төлөлт нь аж ахуй нэгж дээр 100 хувь очихгүйгээр 80 хувь, 20 хувь нь баталгаа болох юм. Тэртээ тэргүй иргэн 10 хувиа төлөөд 90 хувиа удаан хугацаанд төлж байгаа. Энэ систем нь хоёр хуваагдаж л орж байгаа юм. Банкууд санал солилцож, ингэж ажиллах боломжтой гэж үзэж байгаа. Ингэж гарын үсэг зурсан байгаа.

Монголбанкны ерөнхийлөгч Н.Золжаргал: -10 хувийн асуудлыг бол тодорхой ярьсан. Тооцоо судалгаагаа өгөх юм бол бид энэ асуудлыг судлаж үзье. 8 хувийн зээлтэй холбоотойгоор маш тодорхой Цэцийн дүгнэлттэй холбоотой бичгийг Засгийн газарт хүргүүлсэн. Засгийн газраас одоо хүртэл бид нарт хэрхэн ажиллах, энэ хөтөлбөрийг хэрхэн үргэлжлүүлэх талаар санал ирээгүй байна. Боловсруулж байгаа байх гэж л найдахаас. Ипотекийн үйл ажиллагааны журам Монголбанкинд 2008 онд батлагдсан юм. УИХ-аас энэ хуулийг 2009 онд гаргасан байдаг юм. 2012 онд гэнэт эхэлчихсэн юм биш. Маш өндөр хүүтэй, хүртээмж муутай, чинээлэг хүмүүсийн хамрагддаг байсныг дундаж давхаргадаа боломжийн үнээр нь санал болгосон ийм бодлогын тогтолцоог хэрэгжүүлсэн юм. Амжилттай хэрэгжсэн учраас өнөөдөр 80 мянга гаруй өрх орон сууцандаа орчихсон байна. Жилдээ 350 тэрбум төгрөг хуримтлагдаж байгаа юм. Энэ тогтолцоог зөв, буруу гэж ярих шаардлагагүй юм. Энэ бол Монгол Улсын эдийн засагт хэрэгтэй тогтолцоо Ц.Нямдорж гуай.

УИХ-ын гишүүн Д.Ганхуяг: -Иргэд орон сууцтай болно гэдэг нь үл хөдлөх хөрөнгөтэй болно гэсэн үг. Зээл авах боломж нь тэр хэмжээгээрээ тэлнэ. 2012 оноос өмнөх Засгийн газруудын хэрэгжүүлж байсан моргейжийн зээлийн  хэрэгжилтийн үр дүн  ямар байна. 5000 орон сууцаар хэмжээд явбал 60-70 жилийн дараа л Монголчууд орон сууцтай болохоор удаашралтай явж байгаа. Бид  иргэдэд бэлэн мөнгө тараах биш орон сууцтай болгох л чухал. Ингэж байж иргэддээ дэмжлэг үзүүлнэ.  Хамгийн гол нь нөхцөл сайтай зээл байх шаардлагатай. Найман  хувийн хүүтэй, 30 жилийн хугацаатай зээл нь бусад орнуудтай харьцуулахад сайнд тооцогдохгүй. Бараг л арилжааны зээлтэй адил хүүтэй. Үүнийг хэрэгжүүлэхийн төлөө Монголын төрд ажиллаж байгаа бүх хүн оюун ухаанаа уралдуулах ёстой. Гэтэл энэ асуудлаар улстөржөөд байгаад харамсаж байна.  Иргэдийн хашааны газрыг дэд бүтэцтэй болгоод эдийн засгийн эргэлтэд оруулахгүй бол ямар ч үнэ цэнэгүй болно. Гэтэл үүнд ҮХЦ хориг тавьчихсан. Тиймээс орон сууцны зээлийн нөхцөлийг яваандаа тогтвортой хэрэгжүүлэх хэрэгтэй. Өнөөдөр 8 хувийн зээлийг хүчингүй болгосноор төр, засаг ажлаа хийж чадахгүй байна гэж үзэхээр байна. Засгийн газар, Монголбанк хамтарч ажиллах ёстой.