Хууль бусаар 31 идлэг шонхор шувуу барьсан Абдул Каримын хэрэг Прокурорын байгууллагад хянагдаж байгаа аж. 

Хэргийг эргэн сануулахад Нийслэлийн Мэргэжлийн хяналтын газарт өнгөрсөн оны аравдугаар сард манай улсын зарим иргэдээс Катар улсын иргэд их хэмжээний идлэг шонхрыг хууль бусаар авч тэжээж байж болзошгүй гэх мэдээлэл ирсэн байна. 

Мэдээллийн мөрөөр тус газраас СХД-ийн 32 дугаар хорооны нутаг дэвсгэр, Баруун турууны орчим хяналт шалгалт хийсэн агаад шалгалтаар 61 шонхор шувуу тэжээж байсан катар иргэдийг илрүүлсэн байна. Эдгээр шувууны 30 нь зөвшөөрөлтэй байсан бөгөөд үлдсэн 31 идлэг шонхор шувууг зөвшөөрөлгүй барьсан нь тогтоогдсон юм. Түүнчлэн эдгээр идлэг шонхруудыг Монгол Улсын иргэншилтэй Араб гаралтай Абдул Каримын эзэмшлийн отогт байршуулсан байсан аж. 

Тэгвэл эл асуудал нь Абдул Карим Улаанбаатар Хэвлэх үйлдвэрийн барилгыг худалдаж авсанаар дахин сөгөгдсөн билээ. Хууль бусаар идлэг шонхор шувуу худалдаалсан гэх түүнд торгуулийн арга хэмжээ авсан гэхээс өөр мэдээлэл байхгүй байсан бол эл хэргийг Прокурорын байгууллага дээр хянагдаж байгаа гэдгийг эх сурвалж мэдээлэв.

Энэ хэргийг талаар бид эргэн мэдээлэх болно.