“Ирвэс хамгаалах сан”-гийн биологич залуу Т.Лхагвасүмбэрэлийн үхлийн шалтгаан өнөөдөр ч таавар хэвээр олны анхаарлыг татсаар байгаа билээ.

 Тэгвэл олон асуулт эргэлзээ төрүүлээд буй энэхүү хэргийн талаар дөнгөж сая УМБГ хийгээд ЦЕГ-аас мэдээлэл хийв.

Т.Лхагвасүмбэрэл агсаны амиа алдсан шалтгааны талаарх шинжээчдийн анхны дүгнэлт гарсан талаар тус газраас мэдээлсэн юм. Шинжээчдийн дүгнэлтээр Т.Лхагвасүмбэрэл агсан живэлтийн улмаас амиа алдсан болох нь тогтоогдоод байгаа аж. Мөн тухайн үед хөнгөн зэргийн согтолттай байсан нь шинжилгээгээр тогтоогджээ.

Түүнчлэн "Цензургүй сурвалжлага" нэвтрүүлэгээр олонд ил болсон түүний утасны бичлэгийн талаарх шинжээчийн дүгнэлт ч мөн гарчээ. Тус дүгнэлтээр Т.Лхагвасүмбэрэл агсан нь тухайн үед бичлэг хийхдээ ганцаараа байсан бөгөөд ганцхан түүний дуу хоолой утсанд бичигдсэн нь тогтоогдсон аж.

ЦЕГ-аас мэдээлснээр Т.Лхагвасүмбэрэл агсан амиа алдах үедээ унаж явсан машинаас нь машинаас нь хагас шил архи, утас зэрэг зүйлс олдсон байна.

Дэлгэрэнгүйг удахгүй хүргэнэ.

Д.Ундрах /24tsag.mn/