Гурван сар орчмын хугацаанд яригдаж буй Шадар сайдын асуудал өнөөдөр ч олны анхаарлыг татсаар байна. Засгийн газраас МАХН-ын дарга Н.Энхбаярыг Шадар сайдад томилох боломжтой эсэхээр мэдээлэл авахаар АТГ-руу албан бичиг илгээсэн.
Үүний хариуг ч АТГ-аас Засгийн газарт хүргүүлж, “Н.Энхбаярыг Шадар сайд болгох боломжгүй, түүний ялын хугацаа дуусаагүй, зарим хэрэгт шалгагдаж байгаа” гэх хариуг өгөөд байгаа билээ.
Н.Энхбаярыг Шадар сайд болгох асуудал яригдаж эхлэх үед МАХН-ын Ерөнхий нарийн бичгийн даргыг түр орлон гүйцэтгэгч Ц.Шаравдорж мэдээлэл хийж, намын даргаа “Өршөөлийн хуульд хамрагдаж, ялгүй болсон” хэмээж байсан. Тэгвэл Ерөнхийлөгчийн хүний эрх хуулийн бодлогын зөвлөх Ч.Өнөрбаяр “Н.Энхбаярын ялтайд тооцох хугацаа дуусаагүй” болохыг тайлбарлажээ. Ингээд тэдний байр суурийг “24 VS 24” буландаа онцолж байна.
|
Ц.Шаравдорж: Намын даргын ялтайд тооцогдох хугацаа өршөөгдсөн
2012 онд Ерөнхийлөгчийн зарлигаар Н.Энхбаярт шүүхээс өгсөн ялыг уучилсан. Тиймээс ялгүй болсон. Харин энэ наймдугаар сард баталсан Өршөөлийн хуулиар бусад иргэдийн адил ялтайд тооцогдох хугацаа нь өршөөгдөж, төрийн алба хаших эрх нээгдсэн. Ямар ч хориг саад байхгүй.
МАХН-ын дарга Н.Энхбаяр ямар ч албан тушаал дээр ажиллах бүрэн боломжтой хүн. Урьд нь ямар албан тушаал эрхэлж байсныг бүгд мэднэ. Тиймээс харшлах зүйл байхгүй, зүй ёсны асуудал гэж бодож байна.
Шадар сайд болох асуудалд Н.Энхбаяр дарга өөрөө хүсэж байгаа эсэх нь чухал биш. Энэ бол намын гишүүдийн байр суурь. Засагт хамтарч байгаа л юм чинь намын дарга нар өөрсдөө Засагт орж ажиллах ёстой гэдэг байр суурьтай байна. |
Ч.Өнөрбаяр: Н.Энхбаярын ялтайд тооцох хугацаа дуусаагүй
Н.Энхбаярыг Өршөөлийн хуулиар гэм буруугүй болсон гэх асуудал олон нийтийн дунд яригдаж байх шиг байна. Өршөөлийн хуульд авлига, албан тушаалын хэргийг, бас энэ төрлийн хэргийн ялтай байдлыг өршөөгөөгүй.
Зарим хүн шинээр батлагдсан Эрүүгийн хуульд ял шийтгэлтэй байдал гэсэн ойлголт байхгүй учраас Н.Энхбаярыг ял шийтгэлгүйд тооцно гэж тайлбарлаж байгаа. Гэтэл энэхүү хууль нь ирэх есдүгээр сарын 1-нээс мөрдөгдөж эхлэх юм. Тэр хүртэл одоо мөрдөж байгаа Эрүүгийн хууль хүчин төгөлдөр үйлчилнэ.
Гэм буруутайг шүүх тогтооно. Ерөнхийлөгч уучлалт үзүүлнэ гэдэг нь ялыг биечлэн эдлэхээс уучилсан болохоос гэм бурууг уучилж байна гэсэн үг биш. . |
24tsag.mn
Сэтгэгдэл (32)