Д.Доржханд: Б.Найдалаа ХҮН-ын дарга боллоо

Хөдөлмөрийн Үндэсний намын Төв хорооны хурал болж, нам дотроо үүсээд байгаа асуудлын талаар ярилцаж, намын дарга УИХ-ын гишүүн С.Ганбаатарыг албан тушаалаас нь огцруулж, Б.Найдалааг намын даргаар томилж, тамга тэмдгийг нь гарууллаа.

“Хөдөлмөрийн Үндэсний нам ёс зүйтэй нам. Монгол улсад институцийг бий болгох, дүрэм журмаа сахиж ажиллана гэсэн итгэл үнэмшилтэй. Тэрнийхээ хүрээнд намын дүрэм журмын дагуу холбогдох албан тушаалтнуудад хариуцлага хүлээлгэх асуудлыг өнөөдрийн хурлаар хэлэлцлээ. Хурлын хүрээнд ХҮН-ын дарга С.Ганбаатарын асуудлыг хэлэлцэж намын даргын албан тушаалаас түдгэлзүүлэх шийдвэр гаргалаа. Мөн 2016 оны сонгуульд ажиллах багийг өнөөдрийн хуралдаанаар баталгаажууллаа” гэдгийг Ерөнхий нарийн бичгийн дарга асан Д.Доржханд мэдээллийн үеэр онцолсон.

Түүнчлэн тэрбээр “Хариуцлагын ерөнхий хороо гэдэг дээд шатны байгууллагын тушаал гарган татан буулгасан. Өөрийг нь хянах ёстой субьектыг татан буулгаснаар намайг намын Ерөнхийн нарийн бичгийн даргаар ажиллаж байхад гадагшаа томилолтоор явсан хойгуур энэ тушаалыг гаргасан. Гэтэл намын дарга болоод хоёр гуравхан долоо хоногийн дотор анхны тушаалаараа намын Ерөнхий нарийн бичгийн даргыг чөлөөлж, хоёр дахь тушаалаараа Хариуцлагын ерөнхий хороог татан буулгасан. Тэгэхээр энэ хүн багийн системээр, намын зарчмаар олон түмний итгэлийг аваад явж чадахгүй гэж үзсэн. Дүрэм журмаа барьдаг, инстуцыг бий болгодог нам байна гэсэн агуулгаар хариуцлага тооцсон. Намын төв хороо өнөөдөр хуралдаж олонхын шийдвэрээр намын даргад хариуцлага тооцох нь зүйтэй. Ингэж байж бид цаашдаа цэвэр хариуцлага, бодлогыг бий болгож, ард түмний итгэлийг хүлээнэ.

О.Алтангэрэл: С.Ганбаатар огцроогүй

С.Ганбаатарыг намын даргаас огцруулсан гэдэг нь  ташаа мэдээлэл. Манай намын дүрэм “Намын даргыг төлөөллийн төв байгууллага буюу Намын төв хороо/ НТХ/-гоор  хэлэлцэж шийдвэрлэнэ” гэж заасан байгаа.  Хөдөлмөрийн үндэсний нам /ХҮН/-ын  Төв хороо гэдэг нь АН-ын ҮЗХ, МАН-ын Бага хуралтай ижилхэн. Өмнөх Их хурлаараа манай нам Төв хорооны гишүүдээ 56 хүний бүрэлдэхүүнтэй байгаар шийдвэрлэсэн.  Өнөөдөр НТХ-ын гишүүд гэх арваад хүн хуралдаад Б.Найдалааг намын даргаар сонгосон гэж мэдээллээ тараагаад байна.

С.Ганбаатар огцроогүй.  НТХ-ын гишүүд өнөөдөр сургалт, семинартай байгаа. Маргааш хурлаа албан ёсоор хийнэ.  Өөрөөр хэлбэл, маргааш хуралдах НТХ-ны хуралдаанаар олонхын шийдвэрээр өнгөрсөн хугацаанд болсон маргаанд цэг тавигдана.  Асуудлын гол нь хэн намын дарга, Ерөнхий нарийн бичгийн дарга болохоос илүү ХҮН Улс төрийн  намын тухай хууль болон намын дүрмийн дагуу үйл ажиллагаа явуулж,  хууль ёсны шийдвэр гаргах ёстой. 

Гэтэл  цөөн хэдэн нөхөд маань  ХҮН-ын мянган, мянган гишүүдийн сонголтыг үл хүндэтгэсэн шийдвэр гаргаж байгаад харамсаж байна.  Маргааш Төв хорооны гишүүдийн олонх асуудлыг яаж шийдсэнээс дараагийн арга хэмжээг авна. Ер нь бол хууль бус шийдвэр гаргасан нөхдүүдтэй хариуцлага тооцож хуулийн байгууллагуудад хандана.

Бид намын дүрмийн дагуу шийдвэрлэж чадна гэдэгтээ итгэлтэй байна.  Өөрөөр хэлбэл, олонхын зарчмаар, хууль дүрмийн дагуу  ардчилалтайгаар асуудлыг шийдэх болно. Бид ингэж л улс төрийн ёсол тогтооно. Өөрөөр хэлбэл, ХҮН-ын дотоод асуудал бүгд намын дүрмийн дагуу шийдэгдэнэ.