"Нарантуул" худалдааны төвд өнгөрсөн шөнө дахин гал гарчээ. Тодруулбал, Нийслэлийн Онцгой байдлын газарт 03:36 цагт "Нарантуул захад гал гарч байна" гэх дуудлага ирсэн байна. Дуудлагын дагуу анги бүрэлдэхүүн шуурхай ажиллаж галыг бүрэн унтраажээ.

Одоогоор галын шалтгааныг тогтоохоор ажиллаж байгаа аж. Галыг унтраахаар найман ангийн аврагч, гал сөнөөгч нар ажилласан байна. 

Галын дүгнэлт гараагүй бөгөөд шинжээчид галын шалтгааныг тогтоохоор ажиллаж байгаа учир худалдаа эрхлэгчдийг дотогш нэвтрүүлэхгүй байгаа аж. 

Түүнчлэн гал шөнийн  03:00 цагийн үед гарсан бөгөөд тус худалдааны төвийн бөс барааны хэсгийн найман эгнээ бүрэн шатсан байна. Нэг эгнээнд арав орчим лангуу байдаг бөгөөд галын улмаас нийтдээ 80 орчим лангууны бараа бүрэн шатсан гэдгийг түрээслэгчид хэлэв.

“Нарантуул” захад гал гарсан шалтгаан, хэн гал тавьсан болохыг тус захын эзэн Ш.Сайхансамбуу мэдэж байгаа юм байна. Тэрбээр өөрийн цахим хуудаснаа Нарантуулыг санаатайгаар шатаагаад байгаа тухай сэтгэгдлээ бичжээ.

Энэ талаар "Нарантуул бол миний зах биш. Олон хүний амьдралыг авч яваа ажил хөдөлмөр, аз жаргал буцалсан газар. Хэн шатаагаад байгааг би мэдэж байна" хэмээн жиргэсэн байна.

“Нарантуул” олон улсын худалдааны төвд гарсан галын талаар Онцгой байдлын ерөнхий газар болон Цагдаагийн ерөнхий газраас мэдээлэл хийв. 

Одоогоор галын тархалтын хэмжээ болон шалтгааныг тогтоогүй байгаа аж. Харин галын дуудлага Онцгой байдлын ерөнхий газарт 03:39 цагт ирж, улмаар Нийслэлийн гал унтраах найман ангийн 100 гаруй албан хаагчид шуурхай ажиллаж 04:29 цагт галыг унтраасан гэдгийг албаны хүмүүс мэдээлэв.

Мөн цагдаагийн байгууллагын 70 гаруй албан хаагчид хамгаалтанд гарсан бөгөөд галын шалтгааныг тогтоохоор шинжээчид Цагдаагийн ерөнхий газар, Онцгой байдлын ерөнхий газар мөрдөн шалгах ажиллагааг явуулж эхэлжээ. Албан бус эх сурвалжийн мэдээлж буйгаар галыг цахилгааны утаснаас гарсан хэмээж байгаа бол албаны хүмүүс үүнийг үгүйсгэлээ.

24tsag.mn Б.Энхжин