Л.Мөнхбаясгалан: Намайг залилсан гээд байгаа мөнгө нь зар сурталчилгааны гэрээ байсан

Сэтгүүлч Л.Мөнхбаясгалан Монгол ньюс мэдээллийн төвд мэдээлэл хийв.

Тэрээр "АНУ-ын 10 жилийн хугацаатай виз надад байдаг. Би "Айр маркет"-аар үйлчлүүлж, өчигдөр 22 цагт Сөүлд очоод цаашид Вашингтонд буух нислэгийн визийг энэ сарын 24-нд авсан байсан. Ингээд өчигдөр нисэх гэж байтал ЭЦГ-аас ахмад н.Баасанжав гэх хүн утасдаж, ирэхгүй бол албадан авчрана гэсэн. Очтол шууд надад эрүүгийн хэрэг үүсгэж, хилээр гарах эрхийг маань хаасан. Тэгээд надад Эрүүгийн хуулийн 148.4-т заасан үндэслэлээр эрүүгийн хэрэг үүсгэсэн гэдгээ танилцуулсан. Тэр нь юу байсан бэ гэхээр 2013 онд "Миат" ХХК-тэй хийсэн 40 сая төгрөгний зар сурталчилгааны гэрээ байсан. Түүнийг маань гаргаж ирээд бүлэглэн үйлдсэн гэмт хэрэг гэж хэлсэн. 

Би Олон улсын эрэн сурвалжлах сэтгүүлчдийн дэлгэсэн Панамын материалд дурдагдсан 49 хүний баримтыг бүрэн эхээр нь авч ирж “Цензургүй сурвалжлага”-ынхаа хоёрдугаар ангийг бэлтгэх гэж байсан юм. Одоо үүнээс хойш янз бүрийн худал мэдээлэл хэвлэлээр гарч байна. 17 жил намайг ингэж гүтгэж байна" гэв.

ЦЕГ: Л.Мөнхбаясгаланг улсад 88 сая төгрөгийн хохирол учруулсан байж болзошгүй

Сэтгүүлч Л.Мөнхбаясгаланд ЦЕГ-ын Эрүүгийн цагдаагийн газраас залилан хийсэн гэх үндэслэлээр эрүүгийн хэрэг үүсгэж, хилээр гарах эрхийг нь хаасан.

Тэгвэл энэ асуудлаар ЦЕГ-ын Хэвлэл мэдээллийн төвөөс дараах тайлбарыг өгсөн юм.

Сэтгүүлч Л.Мөнхбаясгаланд холбогдуулан шалгаж байгаа хэрэг нь “МИАТ” ТӨХК-тэй хийсэн ажил үйлчилгээ үзүүлэх 88 сая төгрөгийн гэрээтэй холбоотой аж. Цагдаагийн байгууллагаас өгсөн мэдээллээр “МИАТ” ТӨХК нь 2013 оны тавдугаар сарын 03-ны өдөр “Эм Эн Пи Ар” ХХК-тай Зөвлөх, Ажил үйлчилгээ үзүүлэх тухай гэрээ байгуулж 40 сая төгрөгийг, “Мэдээллийн менежмент эрхлэгч төв” ТББ-тай Ажил үйлчилгээ үзүүлэх тухай гэрээ байгуулж 48 сая төгрөгийн санхүүжилтийг тус тус олгосон байдаг аж.