“Шударга шүүх” ТББ-ын тэргүүн Х.Бат-Ялалт, “Ийгл” телевизийн сэтгүүлч Т.Алтаншагай нар өчигдөр УИХ-ын гишүүн Л.Эрдэнэчимэгийн Төрийн ордонд тамхи  татаж, архидан согтуурч байгаа 25 секундын бичлэгийг олон нийтэд тараасан. Уг асуудлаар бичлэгийг хийж тараасан гэх Г.Уянга гишүүн байр сууриа илэрхийлж "Эмэгтэйчүүдийг ийм увайгүй аргаар дарах гэж байгаа бол эндүүрэл. Би утсаа алдсан. Хуульч Х.Бат-Ялалт энэ бичлэгийг гартаа оруулчихаад Л.Эрдэнэчимэг гишүүнээс 200 сая төгрөг нэхэмжилсэн гэсэн" гэж хэлсэн.  Тэгвэл сэтгүүлч Т.Алтаншагай "УИХ-ын гишүүн Г.Уянга өөрөө энэ бичлэгийг Н.Учралд зарсан. Миний дотны хүн энэ бичлэгийг Н.Учралаас авч надад өгсөн. Г.Уянга гишүүн утсаа алдсан гэдэг нь худал бөгөөд одоо миний төрд халдаж байна. Тийм учраас би нэр төрөө сэргээлгэнэ" гэсэн юм.

Тэгвэл УИХ-ын гишүүн Л.Эрдэнэчимэг дөнгөж сая уг асуудлаар мэдээлэл хийлээ.

Тэрбээр "2016 оны зургаадугаар сарын 6-ны өдөр Х.Бат-Ялалт надтай ирж уулзаад надад бичлэгийг үзүүлээд 200 сая төгрөг нэхсэн. Энэ бичлэг МИНИЙ ТӨРСӨН ӨДРӨӨР Г.УЯНГА ГИШҮҮН ТОГЛОЖ ХИЙСЭН БИЧЛЭГ. Х.Бат-Ялалтыг явсны дараа би Г.Уянгатай утсаар ярьсан. Уянгаа "Би утсаа хулгайд алдчихсан. Энэ хэргээрээ Чингэлтэй дүүргийн цагдаагийн хэлтэст хандсан байгаа" гэсэн. Би ч гэсэн цагдаагийн байгууллагад хандсан. Хэрэг үүсчихсэн байгаа. Хуулийн дагуу бол Х.Бат-Ялалт цагдаад очиж байцаалт өгсөн байх ёстой. Үүнээс хойш долоо хоног Х.Бат-Ялалт надаас тасралтгүй мөнгө нэхсэн. Сүүлдээ  "Ядаж сонгуулийн дараа өгье түр мөнгө зээлчих" гэсэн. Тэгээд би 50 сая төгрөгийг зээл гээд шилжүүлсэн. Зээлээ төлөхгүй бол насан туршдаа нэхнэ шүү гэж хэлсэн. БИ АЖЛЫН БАЙРАН ДЭЭРЭЭ ВИНО УУЖ, ТАМХИ ТАТСАНДАА, ЁС ЗҮЙН АЛДАА ГАРГАСАНДАА АРД ТҮМНЭЭСЭЭ УУЧЛАЛТ ГУЙЖ БАЙНА. Миний хэлсэн үг бол хүний эрхийн асуудал гэж би бодож байна. Хууль зөрчсөн үйлдэлдээ зохих торгуулиа төлсөн. Өнөөдөр 50 мянган төгрөгийн торгуулиа төллөө. Цаашид өөр ямар нэгэн хариуцлага хүлээх ёстой бол тэрийгээ хүлээнэ гэж бодож байна. Сүүлийн нэг жилийн хугацаанд Таван толгойн ажлын хэсгийг ахлах үеэс байнга дарамт, заналхийлэлтэй тулгарч байгаа. “Аятайхан байхгүй бол ална шүү” гэж утсаар ярьдаг. Тосон бумбын нурууг хамгаалалтанд авсан юм бол Ц.Оюунгэрэл та хоёр 50 тэрбумыг төлөөрэй, хараарай та нар гэж заналхийлдэг. Энэ хэргээс болж биологич залуу амиа алдсан. Х.Бат-Ялалт, Т.Алтаншагай хоёр тэр мөнгөтэй бүлэглэлийн гар хөл болж байна гэж би бодож байна" гэлээ.

Тэр хоёр нэр дэвшигч нар байнга иргэдтэй үүлзаж, мөрийн хөтөлбөрөө танилцуулахгүй ямар их завтай юм бэ? Эрчүүд нийлээд эмэгтэйчүүд рүү ямар муухай дайрдаг юм бэ? Нара руу яаж дайрав, Анужинг яав? Одоо өөр хэнийг онилж байгаа бол. Миний сонгуулийн уриа бол 1072 хувьцааг эдийн засгийн эргэлтэнд оруулах. Иргэд хувьцааныхаа мөнгийг авах гээд банкинд дугаарлаж байна. Би энэ ажлын эхлэлийг тавьсан. Дарамт заналхийлэл доор эхлүүлсэн. Үүний хариуг шат дараалалтай надад барьж байна. Х.Бат-ялалт, Т.Алтаншагай нар хэний санхүүжилтээр үүнийг хийж байгааг хуулийн байгууллага шалгаж үнэн мөнийг тогтоож өгнө гэдэгт итгэж байна. Бат-Ялалт Т.Алтаншагай мэтийн шантаачлагчдийг битгийн сонгоорой гэж уриалах байна. Нам харгалзахгүй эмэгтэй гишүүдээ сонгоорой гэж бас уриалж байна. Цаашид 1072 ширхэг хувьцааг амьд байлгаж жил бүр ноогдол ашиг өгдөг болгохийн төлөө би ажиллана. Монголын баялгийг Монголчуудад үлдээхийн төлөө би тэмцэнэ" гэлээ.

24tsag.mn