Саяхан телевиз сайтуудаар Хан-Уул дүүргийн Засаг Дарга, УИХ-ын 55-р тойрогт нэр дэвшигч Ж.Ганхуягийг өөрийн эрх мэдлээ урвуулан сонгуулийн сурталчилгаандаа Дүүргийн эрүүл мэндийн төвийг сонгочдын саналыг татахын тулд ашиглаж байна хэмээх мэдээлэл гарсаны дагуу Хан-Уул Дүүргийн Эрүүл Мэндийн Газрын дарга Т.Пүрэвчулуунтай ярилцсанаа хүргэж байна.

 
 
Сүүлийн өдрүүдэд танай дүүргийн өрхийн эмнэлэгүүд сонгуулийн хуулийг ноцтойгоор зөрчлөө гэсэн мэдээлэл хэвлэл мэдээллийн хэрэгслээр цацах боллоо. Та энэ талаар тайлбар өгөхгүй юу?

Энэ бол ташаа мэдээлэл. Манай төрийн албаны тэр дундаа манай эмч, эмнэлгийн салбарын ажилчдын ажил, иргэдийнхээ эрүүл мэндийг хамгаалах үйлсийг үгүйсгэсэн мэдээлэл гэж хэлэх байна.

- Дэлгэрэнгүй тайлбайрлахгүй юу?

- Манай байгууллага Эрүүл мэндийн тухай хуулийн 16 дугаар зүйлийн 16.15, 16.16-д зааснаар дүүргийн мэргэшсэн эмч, ажилтнууд Өрхийн эрүүл мэндийн төвд мэргэжил арга зүйн удирдлагаар ханган ажиллах чиг үүрэгтэй. Энэ үүргийнхээ хүрээнд Засгийн газрын тогтоолоор батлагдсан Үндэсний хөтөлбөрүүдийг хэрэгжүүлэх зорилгоор, стандартад заасан нийт эмч нарын үзлэгийн 40 хүртэлх хувь нь урьдчилан сэргийлэх үзлэг хийх ёстой байдаг. Бидний хувьд “Эрүүл насжилт, настны эрүүл мэнд” хөтөлбөрийн хүрээнд жилийн эхэнд хуваарь гарган Өрхийн эрүүл мэндийн төвүүдэд очиж нарийн мэргэжлийн эмч нар ахмад настнуудад жилд нэгээс хоёр удаа үзлэг хийж, дүгнэлт гаргадаг тогтсон арга хэмжээг хийж ирсэн. Энэ бол манай дүүргийн эрүүл мэндийн салбарын жил бүр хийдэг томоохон цар хүрээтэй, үр дүнтэй ажил.

-Танай эмнэлэгийн үзлэг яагаад сонгуулийн үеэр хийгдэж байгаа юм бэ? Цаг хугацааны хувьд олон нийтэд хардалт төрүүлээд байх юм?

-Хөтөлбөр төлөвлөгөөний дагуу 2016 оны 3, 5 дугаар сард 1, 2 дугаар хорооны ахмад настны урьдчилан сэргийлэх үзлэгийг хийх ёстой байсан ч цаг үеийн хэд хэдэн шалтгаанаар хойшлогдсон. Нэгдүгээрт өнгахөрсөн 5 –р сард томуу, томуу төст өвчний тархалт нэмэгдсэн, хоёрдугаарт эрүүл мэнд Спортын Яамнаас Дүүргийн эрүүл мэндийн төвийн магадлан итгэмжлэлийн хугацааг сунгах ажил давхардсан, гуравдугаарт Засгийн газрын 2016 оны 4 дүгээр сарын 18-ны өдрийн “УЛААН БУРХАН ӨВЧНИЙ ДЭГДЭЛТТЭЙ ХОЛБООТОЙ АВАХ ЗАРИМ АРГА ХЭМЖЭЭНИЙ ТУХАЙ” 222 дугаар тогтоолтой тус тус холбоотойгоор хойшилсон.

Манайхан бүгд л мэдэж байгаа шүү дээ. 4,5 сард улаан бурхны өвчний дэгдэлт ямар хэмжээнд байсан. Тэр үед манай эмч, сувилагч эмнэлэгийн ажилчид өндөрсгөсөн ачааллаар ажилласан. Эдгээр шалтгаанаар ахмад настны урьдчилан сэргийлэх ажлыг бид хагас жилийн төлөвлөгөөт ажлын тайлан гаргахтай холбогдуулан 6 сарын 23, 24-ний өдрүүдэд Өрхийн эрүүл мэндийн төвүүд дээр зохион байгуулсан.

Одоо дарааллаад охин улиасны үр цацагдаж ургамлын харшлийг сэдрээх үе эхэлж байгаа энэ үед ургамлын, тоосны харшилтай ахмадуудыг өрхийн эмнэлэгүүдэд  хяналтанд оруулах биеийн эсэргүүцлийг сайжруулах эмчилгээнүүд эхлэнэ.

Энд хардалт төрөөд байх зүйл огт байхгүй. Бид хийх ёстойгоо хийгээд явж байгаа.

- Засаг дарга Ж.Ганххуягтай холбон мэдээлж байсан?

-Огт холбоогүй ажил. Өмнө хэлсэнчлэн, Эрүүл мэндийн тухай хууль болон Засгийн газраас батласан хөтөлбөр, түүнийг хэрэгжүүлэхтэй холбоотой үндсэн чиг үүргийнхээ дагуу ажилласан байтал үүнийг сонгуулийн сурталчилгаа, өрсөлдөөндөө ашиглаж байгаа нь ард түмний эрүүл мэндийг сахин хамгаалах ариун үйлсийг зогсоож улмаар эмнэлэгийн байгууллагын нэр хүндийг сэвтүүлж буй үйлдэл. Сонгууль болж байна гээд 150 000 гаруй хүн амтай дүүргийн эрүүл мэндийн салбар ажлаа зогсооно гэдэг утгагүй асуудал. Бид энэ буруу ташаа мэдээлэл цацсан асуудлаар хууль, цагдаагийн байгууллагад хандаад явж байгаа.

-Өрхийн эмнэлэгт зохиож байгаа үзлэг хэр үр дүнтэй бэ?

-Үр дүнтэй байлгүй яах вэ. Иргэдээ өвдсөний хойно биш өвдөхөөс нь өмнө урьдчилан сэргийлэх зорилгоор дүүргийнхээ ахмадууддаа сүүлийн 3 жил дараалан хийж байна. Онцлоод хэлэхд дүүргийн ахмадууд энэ үзлэгийнхээ үр дүнгээр цаашдынхаа асаргаа, сувилгаа, эмчилгээгээ хийлгээд хэвшсэн гэж хэлж болно. Нийтээр амардаг зуны дэлгэр цаг эхлэхийн өмнө буюу 7 сараас өмнө зохион байгуулдаг нь зуныхаа нийтийн амралтын улиралаар хөдөө, сувилал, уламжлал эмчилгээнд хамрагдахад нь манай энэ үзлэгийн үр дүн их ач холбогдолтой байдаг. Та залуу хүний хувьд анзаарахгүй байж болох ч ахмадуудын хувьд эрүүл мэндийн урьдчилан сэргийлэх болоод тогтсон шинжилгээ, оношилгоонд зайлшгүй хамрагдах шаардлагатай байдаг. Тиймээс бид ахмадууд руугаа очиж үйлчилдэг. Үүнийг хийсэнийхээ төлөө манай дүүргийн эмч, эмнэлэгийн ажилчид бүгд сонгуулийн хар пиард өртөж сэтгэл санааны хувьд хохирол амсч байна.

 
-Танд баярлалаа.

П.Молор
оллоо.мн