МАХН-ын дарга Н.Энхбаяртай уулзахаар АТГ-ын 30 шахам хүмүүс өнөөдөр намын байран дээр нь ирсэн талаар бид мэдээлсэн.

Тэгвэл хуулийн байгууллагын ажилчид явсны дараа МАХН-ын дарга  Н.Энхбаяр сэтгүүлчдийн асуултад хариулт өглөө.

-АТГ-аас танд өмгөөлөгч санал болгож ирсэн үү эсвэл өөр шалтгаантай ирсэн үү?

-Мэдээж намайг баривчлах гэж ирсэн. Өмгөөлөгч гэж тагнуулч хүн авчирч миний эрхийг зөрчиж, бичиг цаасаа өөрсдийн дур сонирхлоороо бөглөчихөөд явах гэж ирсэн. Тэгээд хэвлэл мэдээллийнхэн цугларсан учраас энэ удаад өнгөрөөсөн. “Гадаа машин ихтэй орж болохгүй байна, орж болохгүй байна” гээд хоорондоо яриад байсан. Баривчлах машинаа оруулах гээд байхгүй юу. Аягүй бол шөнө дөлөөр, хэвлэл мэдээллийн хэрэгслийнхэн байхгүй үед ирж баривчлах байх. Би энэ олон камер руу сүүлийн удаа харж байж ч магадгүй юм.

-Г.Шийлэгдамбын хэрэгтэй холбогдуулан таныг баривчлах гэсэн гэх мэдээ ч байна?

-Мэдээж.  Би “Та нар яагаад мөрдөн байцаах ажиллагааны нууцыг задруулахгүй шүү” гэж гарын үсэг авдаг мөртлөө яагаад телевизээр Г.Шийлэгдамбыг хаа хамаагүй юм яриад сууж байгаа юм бэ гэж асуусан. Гэтэл “Бид телевизийг мэдэхгүй” гэж АТГ-ынхан хэлж байгаа юм. Хоёр гурван хоногийн өмнө битгий хэл цагийн өмнө зарласан ч АТГ-ынхан тэрийг таслан зогсоож чадна. Гэтэл тэгээгүй. Г.Шийлэгдамба телевизийн ярилцлагад ороод “Н.Энхбаяр дарга намайг дарамталсан” гэх ярилцлага өгөөд гүжирдэж байна. Би Г.Шийлэгдамбаас хувьдаа нэг ч төгрөг авч үзээгүй. Гэтэл би түүнээс мөнгө авсан юм шиг, намайг Г.Шийлэгдамбын хийсэн ажилтай хамаатуулж байна. Тэр мөнгө нь 50 мянган ам.доллар гэж байгаа юм. Тэр надад ямар ч хамаагүй.

-Таныг өмгөөлөхөөр АТГ-т дөрвөн өмгөөлөгч хандсан мэдээлэл байна. Танд өмгөөлөгч танилцуулсан уу?

-Надад хууль хяналтын байгууллага өмгөөлөгч тулгаж өгөх ёсгүй. Учир нь би цаазаар авах ял аваагүй. АТГ-ын вэб хуудас дээр гарсан мэдээллийг үзэхэд Хуульчдын холбоонд өмгөөлөгч олж өгөх хүсэлт тавьсан тухай байсан. Харин хоёр хоногийн өмнө дөрвөн өмгөөлөгч намайг өмгөөлөхийг хүссэн тухай мэдээлэл мөн вэб сайт дээрээ гаргасан байсан. Би АТГ-аас тэр хүмүүсийн нэрийг явуулах байх, тэр хүмүүстэй уулзаад үзье гэж бодсон. Гэтэл надад тийм бололцоо олголгүй шууд дайрч орж ирээд. Энд байсан хүмүүсийг өөр өрөөнд түгжээд, бүх цонх, хаалгануудыг хаасан. Тэгээд нэг өмгөөлөгч дагуулж орж ирсэн. Би “Хаанаас гараад ирэв” гэхэд “Дарга явуулсан” гэсэн. Би “Дарга явуулах хамаагүй. Би чамайг авах уу, үгүй гэдгээ өөрөө шийднэ” гэсэн. Гэхдээ би тэр өмгөөлөгчийг АТГ-ын захиалгатай өмгөөлөгч гэж үзээд “Чи захиалгатай биш л юм бол өмгөөлөгч ямар ажил хийх ёстой тэрийгээ шаард гэсэн”. Өмгөөлөгчийн хувьд эхлээд надтай танилцах ёстой байсан. Гэвч тэгсэнгүй. Тийм боломж ч олгосонгүй.