Хэвлэлийн хүрээлэнгээс 2012 оны УИХ-ын сонгуулийн сурталчилгааны мониторингийн дүнг Бүгд найрамдахчуудыг олон улсын хүрээлэнгийг захирал Рафаэл Бэжар, төслийн зохицуулагч Б.Одсүрэн, мөн Хэвлэлийн хүрээлэнгийн ахлах судлаачид танилцууллаа.
    Уг судалгааг өдөр тутмын долоон сонин, долоо хоног тутмын гурван сонинд хийсэн байна.  Сонинг сонгохдоо  хэр захиалагчтай мөн хамгийн их уншдаг зэргийг харгалзан үзээд “Зууны мэдээ”, “Ардын эрх”, “Нийгмийн толь”, “Өнөөдөр”, “Үндэсний шуудан”, “Сэрүүлэг”, “Маш нууц”, “Хүмүүс” сонинд  мөн  МҮОНР-д  21 хоногийн турш тандалт хийжээ.

    Дээрх сонинууд нь намуудын талаар хэр тэнцвэртэй мэдээлэл цацсан эсэхэд тандалт явуулахад 47,5 хувь нь МАН,  26,6 хувь нь АН, 10,8 хувь нь МАХН зэрэг дүн гарсан байна. Нийт мэдээллийн өнгө аясыг харвал МАН, АН-ын далд сурталчилгаа давамгайлсан байв. Үүнийг нарийвчилж үзэхэд АН 58,2 хувь, МАН 51,7 хувь МАХН 32,8 хувь, харин төвийг сахисан мэдээлэл 13,5-32,5 хувьтай гарчээ. Мөн нийт мэдээний 49 хувь нь эх сурвалжгүй харин нэг буюу түүнээс дээш эх сурвалж ашигласан нь 51 хувь  байжээ. МҮОНР-ын хувьд харьцангуй тэнцвэртэй мэдээлэл цацсан ч далд сурталчилгаа нэвтрүүлсэн байна. Энэ жил ил сурталчилгаа 33,4 хувь , далд сурталчилга нь 66,6 хувьтай байсан дүн гарчээ.

   2009 оны сонгуулийн үеэр ХМХ хэтэрхий их сурталчилгаа явуулж байна гэх шүүмжлэлд нэлээд өртөөд байсан билээ. Учир нь реклам, шторк илүү цацсан, сэтгүүлчийн бүтээл бага байсан юм. Харин энэ жилийн хувьд харьцангуй багассан гэв. Жишээ нь сэтгүүлчийн бүтээл өмнөх сонгуултай харьцуулахад МҮОНР долоон хувиар өссөн бол сониных дөрвөн хувь болтлоо өссөн байна.

   Судалгаа хийсэн нийт сонины 123 дугаарт сонгуультай холбоотой мэдээ мэдээлэл, шторк, сурталчилгаа гэх зэрэг 1262 нэгж мэдээлэл байсан байна. Сонгуультай холбоотой мэдээ нь нийт сонины 61,4 хувийн зай талбайг эзэлсэн байжээ. Тэр дундаа 54,5 хувь нь сурталчилгаа байсан аж. Хэвлэлийн хүрээлэнгээс энэхүү судалгааг хийхдээ бодит, тэнцвэртэй мэдээлэл хэр байсан, мэдээний өнгө аяс нь ямар байв, мөн сонгогчдод зориулсан материал ямар зай талбай эзэлж байсан гэх зэргээр судалгаа  хийжээ.