Монгол улсын гавьяат жүжигчин, соёлын элч Д.Алтанхуягийн нэрэмжит “Монголын үндэсний балет” улсын анхдугаар уралдаан ирэх сарын 25-26-нд болно. Энэхүү уралдааныг БСШУС-ын сайдын ивээл дор зохион байгуулах бөгөөд Монголын ирээдүйн балетын бүжигчдийг нээн илрүүлэх, төв болон орон нутгийн театрын бүжигчид, улсын болон хувийн сургуулийн суралцагсдад Монголын болон дэлхийн бүжгэн жүжигт гарч буй шинэчлэл, өөрчлөлтийг танилцуулан, эзэмшүүлснээр, бүжгийн жүжгээр дамжуулан мөрөөдлөө биелүүлж, дэлхийн тавцанд бүх л салбарт өрсөлдөх иргэн бэлтгэхэд оршиж байгаа юм.
Уралдаан 6-8 нас, 9-11 нас, 12-14 нас, 15-18 нас гэсэн ангиллаар болох ба хоёр үе шаттайгаар явагдана. Бүртгэл ирэх сарын 1-ний өдөр хүртэл үргэлжилэх юм байна.
Уралдаан явуулах журам
Хугацаа: Уралдаан 2016 оны 11-р сарын 25-26-ны өдрүүдэд Улаанбаатар хотод явагдана.
Хамрах хүрээ: Уралдаанд төвийн болон орон нутгаас бүжгийн урлагт сонирхолтой болон хичээллэж буй бүжигчин, оюутан, сурагчид оролцоно.
Ангилал
6-8 насны ангилалд бүх хүүхдүүд багийн бүрэлдэхүүнтэй оролцоно. Баг 4-12 хүүхдийн бүрэлдэхүүнтэй байна.
9-11 нас, 12-14 нас, 15-18 насны ангилалд гоцлол бүжгээр, ганцаарчилсан оролцогчоор оролцоно. Аль ч насны шалгаруулалтад хүйс үл харгалзана.
Уралдааны үе шат: Уралдаан 2 үе шаттай явагдана.
Мэдүүлэг авах хугацаа: 2016 оны 10-р сарын 01-ээс 11-р сарын 01-ний хооронд явагдана. Уралдаанд оролцсон 8-аас дээш насны хүүхдүүд 2016 оны 12-р сарын 17-25-ны хооронд болох Цөмөөхэй бүжгэн жүжигт оролцох эрхтэй болно
7.Бүрдүүлэх материал: Зохион байгуулагчийн гаргасан бүртгэлийн хуудсыг бөглөн дараах зүйлсийг хамт ирүүлнэ.
Хүүхдийн 4х6 хэмжээтэй цээж зураг 2ш, сүүлийн 6 сард авахуулсан бүжгийн зогсолттой 8х13 хэмжээтэй зураг 1ш. Орон нутгаас эдгээр зургийг и-мэйлд хавсарган урьдчилан ирүүлэх.
