Өнгөрсөн тавдугаар сарын 23-нд МАН-ынхан УИХ-ын сонгуульд нэр дэвшигчдээ тодруулах Бага хурлаа хийн, үүрийн 06.00 цагт тарсан. Гэтэл хурал дууссаны дараахан тус намаас Дорноговь, Говьсүмбэр аймгийн тойрогт нэр дэвшихээр мандатаа аваад байсан “Сод Монгол” группын захирал Ц.Анандбазарыг АТГ-аас баривчлан цагдан хорьсон юм. Намынх нь бага хурлын дараа цагдан хорьсоныг улстөрийн зорилгоор хорьлоо хэмээн иргэд үзэж байсан. Ц.Анандбазар ч үүнийгээ илэрхийлж, шоронгоос захидал илгээж байсан удаатай.
Тэрээр “Би та бүхэндээ өнөөдөр шоронгийн хавчиг өрөөнөөс бичиж байна. Өчигдөр МАН-ын бага хурал хуралдаж, Монголын мянга мянган МАН-ын гишүүдийг төлөөлөн УИХ-ын сонгуульд өрсөлдөх итгэл зүтгэл, оюун билгээрээ шалгаран далан зургаан төлөөллөө сонгон баталсан өдөр АТГ намайг хилс хэрэгт сэжиглэн баривчилж, шоронд хорилоо. Ард түмнийхээ амьдралыг өөрчилж, зовсон олон, ядарсан ард түмнийхээ төлөө тэмцэхээр зориг шулуудан сонгуулийн ажлаа эхэлж байхад баривчилсан нь эргэлзээгүй. Найман жилийн өмнө шүүхийн шийдвэр гарч гэм буруугүй, хилс гүтгэснийг тогтоосон шийдвэрээс зориуд гэмт хэрэг хийсэн байж болзошгүй гэж сэжигтнээр тооцон хорьж байгаа нь зөвхөн улс төрийн зорилготойг харуулж байна. Энэ бузар үйлдлийг Намын бага хурлын шийд гарч ялагдсандаа хорсож, хэзээний луйвартаа гаршсан эрх мэдлийн төлөө хэнийг ч золиосолж чадах нам нэгт Ж.Батсуурь, худал хуурмаг амлалт, төр түвшин царайгаараа үнэн төрхөө нуун дарагдуулсан нутаг нэгт Я.Батсуурь нар зохион байгуулж байгааг ард түмэн та бүхэндээ сонордуулж байна” хэмээн мэдэгдэж байв.
Учир нь Ж.Батсуурь МАН-аас тойроггүй үлдсэн гишүүдийн нэг. Харин Ц.Анандбазарыг цагдан хорьсоноор оронд нь Ж.Батсуурийг түүний суудалд томилсон юм. Өмнө нь энэ тойргийн намын хороонд дээр ч Ц.Анандбазар 80 гаруй хувийн санал авч, нэр дэвших нь тодорхой болоод байжээ. Гэтэл мандатаа авсных нь дараа түүнийг саатуулсан нь улс төрийн зорилгоор хорьсон хэмээн үзэхээс өөр аргагүй хэмээн ярьж байв.
Гэтэл энэ яриа өнөөдөр нэгэнт батлагдах шиг боллоо. Ц.Анандбазарыг цагдан хорьсноос хойш өнөөдрийг хүртэл түүнийг ямар шалтгаанаар цагдан хорьсноо хуулийнхан тайлбарлаагүй нам жим байсан. Тухайн үедээ “Анод” банкны хэрэгт холбогдуулан байцааж байгаа гэсэн боловч үнэн эсэхэд хэн ч тайлбар хийгээгүй юм. Чухам ямар шалтгаанаар хорьсон нь мэдэгдэхгүй байсаар сонгуулийн дараахан буюу өнгөрсөн долоо хоногт түүнийг сулласан байна.
Түүнчлэн түүнд холбогдох хэргийг Нийслэлийн прокурорын газраас хэрэгсэхгүй болгосон хэмээн албаны эх сурвалж мэдээлсэн. Хуулийнхны эл үйлдэл Ц.Анандбазарыг улс төрийн зорилгоор цагдан хорьсоныг баталлаа хэмээн үзэж байгаа юм.
Юутай ч Ц.Анандбазарыг хорьж, УИХ-д оруулахгүй хэмээн захиалсан нэгэн зорьсондоо хүрлээ.
Б.Чимэг
