1. Долдугаар сарын 7-нд Ливид сонгууль болов. Дийлэнх нь анх удаагаа  санал өгч байгаа ливичууд Үүсгэн байгуулах ассамблейн төлөөлөгчдийг сонгоно. Ардчилах үйл явц тийм ч амар байхгүй бололтой.  Ливийн хувьсгалын лидер хэмээн өөрийгөө зарласан Муамар Каддафи “Нам гэдэг нь Барууны бий болгосон бузар булай бүтээл”  гэж үздэг байв. Тэр өөрийн “Ногоон номон”-доо нам байгуулагч нар бол эх орноо худалдагчид гэж бичсэн юм. Каддафийн захиргааны дөч гаруй жилд Ливид Үндсэн хууль, парламент гэж байсангүй. Ямар нэгэн намын гишүүн бол цаазаар авахуулдаг байж.  Муамар Каддафийн мөхөл ба дэглэм нь унаснаас дөнгөж есөн сарын дараа Ливийн байдал огт өөр болжээ. Долдугаар сарын 7-ны хагас сайн өдөр  санал хураах байранд ирсэн ливичууд 140 намын 3800 нэр дэвшигчид ба 370 сонгуулийн жагсаалтаас сонголтоо хийх болсон байлаа. Энэ өдөр Ливийн түүхэнд онцгой гэж болохоор юм. Бараг бүтэн зууны дотор  тус оронд анх удаагаа жинхэнэ сонгууль болж байна.  Сонгуулийн насны 2,8 сая хүний амьдралдаа анх удаагаа сонгуульд оролцсон үйл явдал энэ болов.
2. Хорватын Чиово арлаас холгүй дэлхийн II дайны үеийн тэсрэх бөмбөг олджээ. 200-250 кг жинтэй эл бөмбөгийг нэгэн жуулчин эмэгтэй усанд сэлж явахдаа илрүүлсэн байна. Тус улсын Дотоод хэргийн яам мэдээлснээр, бөмбөг дэлбэрч болзошгүй тул нутгийн оршин суугчид болон жуулчид энэ талаар анхааруулжээ. Мэргэжилтнүүдийн үзэж буйгаар бөмбөгийг өөр газраас энд авчирсан байж магадгүй гэнэ. Эсвэл бөмбөг дайны үеэр энд унасан, түүнээс хойш элс, шороонд  дарагдан хүний нүдэнд өртөөгүй байж болзошгүй аж.
3. БНАСАУ-ын төв телевизээр Микки Маус, Винни- Пухийн баг өмссөн жүжигчдийн тоглолт гарсан байна. Тус улсын удирдагч Ким Жон Унд зориулсан нэвтрүүлгээр Микки Маус, Винни Пух болон бусад жүжигчид дуулж бүжиглэсэн байна. Хүүхэлдэйн киноны эдгээр баатрыг Хойд Солонгосын хүүхдүүд Хятадаас оруулж ирдэг бичгийн хэрэгсэл дээр дүрсэлсэн байдгаас мэддэг аж. Гэсэн ч улсын төв телевизээр Микки Маус, Винни Пух нарыг гаргасан анхны тохиолдол энэ болжээ. Хойд Солонгосын шинэ лидер утга зохиол, урлагийн салбарт томоохон өөрчлөлт, шинэчлэл хийхээ мэдэгдсэн аж.
4. АНУ 2017 он хүртэл Афганистанд санхүүгийн тусламж үзүүлэхээр төлөвлөж байгаа аж. Японы Токио хотод болж буй Афганистаны асуудлаарх олон улсын хурлын үеэр АНУ-ын төдийн нарийн бичгийн дарга Хиллари Клинтон мэдэгджээ. Ойрын таван жилд Афганистанд үзүүлэх санхүүгийн дэмжлэгийг удахгүй Конгресс хэлэлцэнэ хэмээн тэрбээр өгүүлсэн байна. Энэ тусламж нь Афганистаны эдийн засгийг сэргээх өөрчлөлт шинэчлэлт хийхэд зарцуулагдах гэнэ. АНУ-аас Афганистанд үзүүлсэн тусламжийн хэмжээ 2001 онд нэг тэрбум ам.доллар байсан бол, 2012 онд 2.3 тэрбум ам.доллар хүрчээ. Мөн Афганитстаны ерөнхийлөгч Хамид Карзай 2014 оноос хойш АНУ жил бүр хоёр тэрбум ам.долларын тусламж үзүүлэх ёстой хэмээн мэдэгдсэн байна.
5. Францийн хойд хэсгийн Камбре хотод шөнийн цэнгээний газарт гал гарснаас найман хүн шархадсан байна. Хууль сахиулагчид мэдээлснээр, гал нээсэн этгээдийг шөнийн цэнгээний газар руу оруулахгүй гэснээс болж маргаан үүссэн аж.  Хэрэгтэн зугатсан бөгөөд цагдаа нар түүнийг хайж байгаа гэнэ.
6.АНУ-ын Конгрессийн гишүүн, ноён Барни Фрэнк өөрийн найз залуу Жим Редитэй гэрлэлтээ батлуулсан тухай “Boston Globe” сонинд мэдээлжээ. Өдгөө 72 натай тэрбээр 44 настай бизнесмен Жим Редитэй дөрвөн жил хамтран амьдарсан юм. Массачусетс мужид болсон тэдний хуримд 300 орчим хүн байлцсаны дотор сенатч Жон Керри, конгрессийн төлөөлөгчдийн танхимын дарга Нэнси Пелоси нар байжээ.