СЕХ академич С.Нарангэрэл, МАХН-ын дарга Н.Энхбаяр, С.Авирмэд, Э.Батшугар, хөдөлмөрийн баатар З.Ойдов, Санжаадорж нарыг УИХ-д нэр дэвших эрх зүйн боломжгүй гэж үзэн бүртгэхээс татгалзсан. Тиймээс тэд СЕХ-г улстөрийн захиалгаар ийм шийдвэр гаргалаа гэж үзэн Үндсэн хуулийн Цэцэд гомдол гаргаад байсан билээ. Тэдний гомдлыг цэц хэлэлцээд “МАХН-ын дарга Н.Энхбаярыг УИХ-ын сонгуулийн тухай хуулийн 27 дугаар зүйлийн 27.5.2, 29 дүгээр зүйлийн 29.11.4 дэх хэсэг, Сонгуулийн төв байгууллагын тухай хуулийн 12 дугаар зүйлийн 12.3 дахь хэсгийг, С.Нарангэрэл, С.Авирмэд нарыг УИХ-ын сонгуулийн тухай хуулийн 26 дугаар зүйлийн 26.6., 26.7 дугаар зүйлийг, Н.Санжаадоржийг УИХ-ын сонгуулийн тухай хуулийн 26 дугаар зүйлийн 26.6 дугаар зүйлийг, Э.Батшугарыг УИХ-ын сонгуулийн тухай хуулийн 26.4-г зөрчсөн” гэсэн гомдол нь Үндсэн хуулийн зарим зүйл заалтыг зөрчөөгүй. Тиймээс маргаан үүсэх үндэслэлгүй хэмээн үзсэн юм.
Гэвч тэд гомдол гаргаснаар өнөөдөр Цэцийн Бага суудлын хуралдаанаар хэлэлцэх гэж байна. Хэрвээ Бага суудлын хуралдаанаас маргаан үүсэх магадлалгүй гэвэл тэд УИХ-д нэр дэвших боломжгүй. Харин маргаан үүсвэл Дунд суудлын хуралдаанаар дахин хэлэлцэх аж.
Б.Чимэг
